Tura, Dec 20, 2022: Association for Democracy and Empowerment (ADE) Apex Committee, GHADC-o kam ka•enggiparangni dormaharangko Krismas-na skang on•china, changsatai dabiangaha.
Ia kamara dilgiparangni chanchina changgijani aro mandena ka•sagijani kam ong•a, uni gimin, GHADC-o kam ka•giparangni dormaharangko jegitaba Krismas-na skang on•china, ADE mol•molataha.
“Chingni ma•sia gitade, ja 29 mangna dormaha gri kam ka•giparang chakchike kamrangko ka•aha. GHADC-o kam ka•giparang batanggipa 2020 bilsini August ja dipet da•alona dormaha man•gija kam ka•na nangaha” ine ADE Apex Committee, HQ Tura-ni President Dalseng Bira Ch.Momin parakataha.
Batanggipa salrango adita jarangni dormahakosan kam ka•giparang man•aha, indiba da•ode, dormaha on•aniko chu•gimik dontongatsrangaha. Ia obosta Conrad K. Sangma-ni Skotong Minister ong•e dilenggipa sorkari aro GHADC-ni gital CEM, GHADC-o kam ka•giparangna maming ka•sachakani dongsrangja ine ADE janapataha. Iarang kakket ong•jaode, maina ma•giparangko mande ra•gija, GHADC-o kam ka•anirangko mikchepenga ineba ADE sing•doangaha.
Indiba gipin department-rango kam ka•enggiparang, jaanti tik ong•e dormaharangko man•enga aro Krismas Advance-rangko man•tokenga, indide maina GHADC-o kam ka•giparangna jaanti tik ong•e, dormaharangko on•na man•skaja ineba sing•doangaha.
Da•o sing•anide, dingtang dingtang GHADC department-rangni ning•o kajina gile man•enggipa tangkarang kam ka•giparangna dormaharangko on•na chu•ongjama? Ma kijina gile man•gipa tangkarangko jakkalsretaha ineba sing•doangkuaha. Indakgipa kamara sason ka•gipani kam ong•ja, dilgiparang pangnan kam ka•giparangni dormaharangko Systematic ong•e ba tik ong•e jaanti on•anisa namgipa dilgiparangni kam ong•a, ine Dalseng Bira Momin janapataha.
“Chingni ma•siani gitade, kajina gile man•gipa tangkarangko kam ka•giparangna dormaha on•na chu•ongeba gitchapilachim, indiba dilgiparang ong•gija kamrangna jakkalsretani a•selsa GHADC-o kam ka•giparang indakgipa obostako chagrongenga. Chinga ma•mong aro a•dok sorkarini on•atenggipa, financial aids-ni gimin aganjaenga. Koborni gita chingni ma•sianide, a•dok sorkari GHADC-na kror 26 tangkarangko approve ka•e on•ataha. Uni gimin, indakgipa kusini salrango kam ka•giparangna ta•rake dormaharangko on•china, chinga CEM aro MDC-rangko mol•molatenga” ine u•iataha.
“Jangbingbangani gita, adita sak MDC-rang, GHADC-ni tangka paisarangko ong•gija jakkalsretanio jak donga. Indiba chinga dos dakgipa MDC-rangko namedake ma•sikuja, indiba iani bidingo CEM chu•gimik jako rae, kam ka•china chinga mol•molna sika. Chinga nikna man•a, a•dok aro GHADC-o sason ka•enggipa apsan political doloni ong•a. Maini gimin GHADC-o kam ka•giparangna dormaha on•na man•jaenga? Uni gimin, chinga a•dok sorkariko chalaienggipa Conrad Sangma-ko gisik ra•atpiltaina sikenga. Indakgipa maniani salrango kam ka•giparang, chingni jonggipa adatangrang, ma•gipa pagiparang ari no-abirang maniani salo kusi ong•pachina, uamangni dormahako chu•gimik on•na nanga” ine Dalseng Bira Ch.Momin janapataha.
Kusini salko maniengon, sorkari skanggipa manderangna cholko on•ne, dukrangko naljokatna man•na gita tangka paisarangko on•na nangchongmota. Sason ka•enggipa party-ni dilgipa a•doko songdongenggipa manderangni pagipa ong•a. Ua namgipa ong•genchimode, manderangna apsan ka•sana nanga. Indiba ia somoio a•doko kam ka•enggipa manderang dingtangmancha ia dal•begipa maniani Krismas salko kusi ong•e nichaksoenga. Uni gisepon, GHADC-o kam ka•giparangna ia Krismas-ni salo dal•begipa dukni ong•skaenga ine ADE suk ong•gijaniko parakataha.
Minggipin, ding•doenggipa dabianiara, “Sima ario ong•enggipa obostarang, MoU-o soi ka•ani bidingo nipiltaianiko dakchina chinga Assam a•dokna mikkrakataniko on•atenga. Chinga sima arini bidingo nipiltaie kamrangko ka•china gisik ra•atpiltaianiko dakenga. Skangoni Meghalaya a•doko songdongenggipa manderang maming saloba a•doktang chigatangko wate gipin a•dokchi re•angjawa. Indiba chingni grapako changsaba knachakja. Chinga re•anggipa August 22 tariko, chingni jong-ada NGO-rang baksa dingtang dingtang jingjengataniko dakengon, Shillong songjinmaoba ong•atangaha. Chingni jong-ada NGO-rang FKJGP Garo Hills Zone, AYWO, FAF aro Khasi Hills-ni NGO-rang KSU, FKJGP Central Executive Committee, baksa sima arini bidingo jingjengataniko dakaha. Indake chinga August 23 tariko dilgiparang baksa tom•aniko ong•ate song dam 12 jerangan Meghalaya a•doko ga•akachim, uarangko Meghalaya-ni ning•on ong•atpilna ku•rachakaha. Uni gimin chinga dingtangmancha janapgimin dam 3 songranga Malangkona Jaypur, Malangkona Hohuapara and Malangkona Salbari songni manderang Meghalaya-ko watangna ga•akaha” ine ADE janapataha.
Ua songni manderango Meghalaya-ni EPIC donga aro uamang Meghalaya-on skie ra•enga, sorkarini dingtang dingtang kamrangko ka•enga, skul aro gipin official-rang Meghalaya a•doko dongkamgipa ong•a. Indiba uamangko Meghalaya a•dokoniko ma•ekataha. Ua manderang ma•ekatako man•ani gimin ka•tong be•e dukko man•enga. Sorkari songdongkamgipa manderangna ka•sachakna nanga.
Dilgiparangni ku•rachakoni adita salrang batangaha, indiba da•alona kingkingba mamingkon chu•sokatkuja. “Ching baksa chingni jong-ada NGO-rang jekai KSU, FKJGP CEC, FKJGP Garo Hills Zone, AYWO,FAF re•anggipa October 10 tariko gisik ra•atpiltaianiko uamangna on•aha, indiba uamangni ku•rachakako chu•sokatkuja” ine Dalseng Bira Momin parakataha.
Uni gimin a•dok sorkari aro GHADC-ni CEM-ko kam ka•giparangni dormaharangko ta•rake on•china aro nanga gita ku•rachakgipa kattako pe•jachina ADE changsatai mol•molataha.