28 Jan 2022, Tura: Garo Hills Autonomous District Council (GHADC)-o NPP-chi dilenggipa Executive Committee (EC)-ni kosako Bil Tosusaani ba No Confidence Motion-ko ong•atna January 29 tarik Sonibar salni pring 11 bajio dingtangmancha ba special session-ko ong•atchina a•dokni Governor, Satyapal Malik ge•etaniko on•ataha.
Sak 11 Congress MDC-rang gimikan All India Trinamool Congress (AITC)-o napgopangani ja•mano AITC dolan GHADC-o mongsongbate warachakgipa dol ong•skaha.
GHADC-o NPP-chi dilenggipa EC-ni ning•o adita meligrikgijanirang dongengani gimin AITC dol NPP-ni dilenggipa EC-ni bilko dake nina miksongenga ineba kobor man•soaha.
GHADC-o CEM ong•enggipa Benedic R.Marak-ni kamna suk ong•niktokjaenggipa NPP-ni MDC-rang uko CEM ong•aoniko ra•gale da•o Chairmnan ong•enggipa Rakesh Sangma-ko CEM songskachina NPP-ni dilgiparango dabitokenga ine kobor ra•timgiparangna parakataha.
Re•anggipa January 25 tariko NPP-ni MDC sakgni baksana EC-o bakrimenggipa Zikzak-ni Independent MDC saksako GHADC-ni CEM, Benedic R.Marak Chairman ong•aoniko ra•galaha.
Chairman-oniko ra•gala man•giparangara Garo Hills Growers Association-ni Chairman Linekar K.Sangma, Planning & Advisory Board-ni Chairman Sengchim Sangma aro Forest Advisory Committee-ni Chairman Aktar Ali-ko GHADC-ni CEM, Benedic R.Marak dingtangmancha u•iataniko on•atenba uamangko kamoniko ra•galpilaha.
Indake ong•engon Linekar K.Sangma aro Sengchim Sangma-de NPP MDC ong•achim, indiba Aktar Ali-de Independent MDC ong•achim. Ua sakgittam MDC-rangko kam ra•galaha ine parakatani ja•man, Linekar K.Sangma-ni parakatani gitade, uamangko kam ra•galja, indiba uamang an•tangtangsa kamoni ong•kataha ine parakatskaha