Tura, December 10, 2021: Re•anggipa ia jani 6 tariko “Save B-Mahal” Committee-rang Pedaldoba-o tom•aniko ong•ate chanchirimaniko dakenba, GHADC-ni kosako Public Interest Letigation (PIL) ka•na gita Rimjen Ch. Sangma-na bilko on•aha.
Rimjen Sangma-ni u•iatani gitade, GHADC-ni CEM, B-Mahal jolrango songdongenggipa songni nokni manderang baksa maming chanchirimgija aro sing•cheng sanchenggija, an•tangni sika gita B-Mahal-ni a•arango IRBN Camp-ko rikna, Solar Park tarina aro sruksruk Israel Agriculture Company-na a•arangko palna chanchimanaha.
Unbaksa GHADC, changsa Settlement-ko tarie on•na nokdang ge•prakan tang gong hajal 40,000-ko gamchina aganaha aro nokdang ge•prakna a•a bigha 2-ko suale on•na tik ka•aha ine matnangaha.
Indake ong•engon ua jolni Social Activist saksa Rimjen Ch. Sangma, CEM Benedict R.Marak-ni kosako jagale Shillong High Court-o badi ka•na tariaha aro apsan dake da•o ong•enggipa EC-rangni kosakoba mokordoma ka•na gita lekkarangko tariaha ine parakataha. GHADC, B-Mahal jolni manderangko cha•bokaha aro Indian Constitution-ni Article 14-gipa niamko pe•aha ine matnangaha.
B-Mahal jolo songdonggipa manderang Garo Hills-ni je biapoba songdong a•chana bil donga. GHADC-ara niamko tarigipasa ong•a, maming dakeba a•arangko ra•seke gipinna palna ba on•na man•ja ine Rimjen Sangma parakataha. Zamindari System ong•na skangonin Mechpara aro Karaibari songni a•arang Garorangnisa ong•a. Uni gimin GHADC-de kajina giltimgipasa ong•a, a•ani nokgipa ong•ja ine Rimjen Sangma jegalataha.