Tura, Feb 8, 2023: NPP dilgipa Pa Conrad K Sangma Sombar salo 57-Dalu elakkani ning·o donggipa Machangpani-ona re·ange NPP candidate Brening A Sangma-na chakrimgiparangko bang·batatna tom·anio bakko ra·eaha.
Pa Sangma tom·anio aganengon, Focus aro Focus + scheme-rang ma·mong sorkarini ine gipin dolrang manderangna aganne ong·gija kattarangko campaign-rango gipatjachina BJP dolko didiangaha.
PM Kisan-ara dingtang program ong•a aro bang·bata game cha·giparangan a·doko a·arang dongtokjani gimin ia program-ko a·doko a·bachengatna man·jaha ine aganaha.
NPP-ko dakgrikchakna BJP-o maming chol aro kam dongja. Uandake tol·gipa kattarangko BJP gipatenga ineba aganangaha.
Garo Hills-o BJP seat ge·gnina bate amjawa, uandaken re·baenggipa election-o BJP maming dingtangani dongjawa. BJP-oni bang·a manderang aro MDC Dhormonath Sangma NPP-o napaha.
A•doko NPP-ni gipani namen bilakaha aro manderang an·tangtangni vote-ko gipin party-rangna on·ne gimaatjachina aro NPP-na vote on·china Conrad Sangma sakantikon didiangaha.
“A·dok gimikon 2023 bilsini election-o dilgiparangko seokani namgipa balwarang balenga, manderang ku·rangrang srangen gam·enga aro NPP gimikna bate bang·bate ia election-o chegopkgen” ine Pa Sangma aganangaha.