Tura,June 11, 2022: Garo Hills a•jani NGO-rang jekai Tura Garo Senior Citizens Forum (TGSCF)-ni General Secretary Gredalsan C. Momin, Garo Graduate Union (GGU)-ni General Secretary Meril N Sangma, New Tura Development Forum (NTDF)-ni General Secretary Lyndon Ch. Momin, Association for Democracy and Empowerment (ADE) (Apex Committee)-ni President Dalseng Bira Ch. Momin, Khasi Jaintia Garo People, Garo Hills Zone (FKJGP-GHZ)-ni President Pritam Arengh, A•chik Youth Welfare Organisation (AYWO) Central Governing Body (CGB)-ni President Sengbath Ch. Marak, Federation for A•chik Freedom (FAF) Centre Executive Committee (CEC)-ni President Brinbal M. Sangma jinma apsan ku•monge a•dokni Skotong Minister Conrad Sangma-na Sonibar salo lekka sedoate Assam aro Meghalaya a•dokni sima ario songdongenggipa A•chikrangna chel•chakaniko on•china didiataha.
“Garo Hills-ni NGO dilgiparang June 6 tariko tom•aniko ong•ate, tom•anio a•dokni sima ari jolo songdongenggipa A•chikrangna dakchakaniko on•gilpana chanchirimaniko dakangaha. A•dok damgnini Skotong Minister-rang Conrad Sangma aro Himanta Biswa Sarma sima ario donggipa A•king a•dokni nokgiparang, ADC-ni dilgiparang, songni nokni dilgiparang aro songni manderang baksa mamingkoba ku•mongchenggija re•anggipa March 29 tariko Memorandum of Understanding (MoU)-o soi ka•ani a•sel sima ari jolo songsongenggipa A•chikrangko Assam a•dokni pulisrang aro manderang kal•steke, onchepe aro sinjete bang•a neng•nikaniko on•engachim.
Iandakgipa obostarangni a•sel sima ari jolo songdongenggipa A•chikrang bang•a neng•nikanirangko chagrongna nangenga. Uni gimin Meghalaya sorkari A•chikrangko indinari kal•ake aro sinjete roaniko nie dongna nangja, uamangni obostarangko niate ja•ku de•na nangchongmota. Assam aro Meghalaya a•dokni sima ari jolo border-ni krong ba border pillar-ko songna nangja, songgenchimoba a•dok damgnini dilgiparang aro ma•mong sorkarini dilgiparangni mikkangosa songna nanga. Ia ong•enggipa obostarangko jrip nie dongaigenchimode, jatska jat dakgrik dinggrikaona soknaba gnang” ine NGO-rang janapataha.
Sima ari jolo songdongenggipa mitam A•chikrangko Assam a•dokni rorirang kal•steke roan baksana Pulisrang A•chikrangko skatang rim•e pattoko chipe donenga, ian dal•begipa A•chik jatrangko kal•steke roani kam ong•enga. Sorkari ia obostarangni bidingo ta•rake nirok sandianiko dakenba duko ga•akenggipa aro sinjetako man•enggipa A•chikrangna chel•chakaniko ba naljokaniko on•na nangchongmota ineba NGO-rang Skotong Minister-na seatgipa chittio janapataha.