Tura, April 19, 2023: Garoland State Movement Committee (GSMC), A•chikrangna dingtang A•dokko dabianio bilakbatatna dal•begipa tom•bimonganiko ong•atangaha.
Ia tom•bimonganiko GSMC, HQ Tura-ni Co-Chairman Jakrak A. Sangma dilangaha. Tom•anio GSMC Dadenggre Zone-ni Chairman Garoland-na dabianio apsan ku•monge kamko ka•na miksonganiko agan talatangaha.
Ian “an•ching A•chik jatna namen nangchongmotgipa aro ku•monge kam ka•na nangenggipa ong•a” ine aganangaha.
GSMC HQ-ni Publicity Secretary Chivibirth K.Marak, Garoland State-na dabiani gimin talatangengon, “Garoland State-ko an•ching A•chikrangna namen nangchongmotenga, maina gimikni gitan lekka poraiani, kam man•ani, namroro silroroani namen ja•manchakenga. Gipin biaprango namroro silroroani namen tang•doangenga, indiba A•chik a•songo songdongenggipa manderang, Meghalaya a•dokko ba State-ko man•chengaoni da•alona kingking, IAS, IPS, IFS uandake chu•bata gadango poraie pass ka•gipa A•chikrang bilsi 50 ong•piloba chu•onga gita dongkuja. Indiba A•chik A•songara Nokgipa Isol-ni pattigimin a•dok ong•a. Uni gimin, A•chik sakantian, mikkangchina chanchie Garoland State-ko man•na krengani ong•engaha” ine aganangaha.
South West Khasi Hills-ni Clivestar Ch. Marak, Khasi Hills-o ong•enggipa obostani gimin talatengon, Chinak, Konjoi, Ranikor-oni re•bagipa manderangni palo aganengon, “Chingni song jolrango gimikni gitan namen galchipako man•batenga, uni gimin Ranikor, Chibak, Konjoi songrangkoba Garoland State-na re•mikkanganio galchangna nangja. Ong•jaode mikkangchi rakgipa sinjetaniko man•gen” ine aganangaha.
Indake ong•engon, gittimantini dilgiparang apsan ku•monge jatna kamko ka•na ineba agandapangaha.
Unbaksana GSMC Raksamgre Regional Unit-ni Chairman Medison Ch. Marak, A•chik jatna ka•kimchae kamko ka•angna sakantikon mol•molangaha.
GSMC, HQ Tura-ni Co-Chairman Balkarin Ch. Marak, “An•ching A•chik ong•e, namen rasong gnang, Nokgipa Isol nama miksonganio A•chik a•songko pattiaha. India a•songni Niam Bidik ba (Constitution)-o pangchake an•chingna Garoland State-ko on•na bil donga. Garo Ku•sik-ko agangipana State-ko on•na nanga, maina ku•sik agannanio pangchake, Marati Ku•sikko agangipana Maharashtra State-ko on•aha. Indiba Tripura State-o Tripuri ku•sikko agangipa manderang an•tangtangni bilko gima•atjok, uko ripingpilna ong•kate, MLA sak 14 man•taijok, uamang da•alo nisan badalatjok. Rev. Gilbert K. Marak, “A•chik A•song damgipin A•gisi ine aganaha, hoe A•chikrang mikkrakjaode, A•chikrangni bilko gimaatgen. Sonaram R. Sangma 1895 bilsion niksamsoe, A•chikrangoni skangipa rama dilchengaha. Garoland State, ian A•chik An•chi jokenga, uni gimin sakantian A•chik A•doko songdongengipa manderangan ong•a. Hai A•chik sakanti mikkangchina niksamsoe, jakgitelo dongna Garoland State-ko bilake dabina” ine sakantiko ku•mongangaha.
Apsandake, GHADC-ni Deputy Chief Executive Member Nikman Ch.Marak, “Garoland State ian chasongni chasongna A•chik jatni dal•begipa gam-jinko ripinggipa ong•a. Garoland State-ko on•na, State Reorganisation Act-ko India sorkari nipiltaina nangenga.
Da•alo Roster System-ni gimin jatsa jatgipin baksa nangtingrikenga, A•chikrangni bak rengsiko chu•gimik man•pachina, Meghalaya High Court raiko on•aha. Gimik bilkon an•ching A•chikrang gimaatgija batesa man•rikrikna nangenga. Uni gimin, A•chikrang gimik a•gilsakni je biapoba Garoland State-na bil jak on•pana nanga” ine didiangaha.
Bostone M.Sangma-ni u•iatani gitade, GSMC mikkangchi mingbonga dakgrikaniko ku•rachake ra•angaha. Uaranga,
Skanggipa Garoland State-ko man•kujana kingking dakgrikna.
Gnigipa State Assembly-o State Reorganisation Commission-na Resolution-ko ra•na nanga. Gittamgipa Roster System-ko dingatjana.
Brigipa Winter Capital-ko on•na nanga.Bongagipa niam gri a•paloni napdrabaenggipa manderangko champengsona nanga.