Garo aro Khasi ku•sikko chetgipa schedule-o ra•gatchina Parliament-o chanchirimna a•baku ra•a
Tura, August 3, 2022: Meghalaya TMC-ni dilgiparang re•anggipa New Delhi-o Garo aro Khasi ku•sikko 8-gipa Schedule-o ra•gatchina dabie jingjengataniko dakangaha.
Indake uamangni dabianiko knachake Parliament-o Garo aro Khasi ku•sikko 8-gipa Schedule-o ra•gatani bidingo Zero Hour-o chanchianiko dakangaha ine u•iataha.
TMC dilgiparang a•songni skotong songjinmaona re•ange dabiani adita sal ja•manan Parliament-o chanchianiko dakna raiko on•naha.
Re•anggipa July 26 tariko TMC dilgipa, Dr Mukul Sangma, MLA George B Lyngdoh unbaksana TMC MP-rang Parliament a•palo chadenge Assam aro Meghalaya a•dokni sima arini bidingo jegalanga unbaksa Garo aro Khasi ku•sikko 8-gipa Schedule-o ra•gatchina dabiangaha.
Indake July 26 tariko songbad setimgiparangna aganprakengon, Dr Mukul Sangma, “Ma•ani skie donanggipa ku•sikan mande sakantini identity ong•a. Indake Garo aro Khasi ku•sikko 8-gipa Schedule-o ra•gatgenchimode, a•dokni bang•a chadamberangna kam ka•ani chol ong•katgnok” ine aganaha.
Indake ong•engon, re•anggipa July 25 tariko TMC-ni MP Derek O’Brien, Rajya Sabha-ni General Secretary-na lekka sedoatenba Garo aro Khasi ku•sikni bidingo aganchanchirimaniko dakna janapataha.
Uni janapatani gitade, “Garo aro Khasi ku•sikko segatna changni chang jotton ka•genchimoba, ma•mong sorkari jechakani ortoara Meghalaya a•dokko aro uano songdongenggipa manderangni ku•sikko dal•e ra•gijani a•sel ong•a. Anga Meghalaya a•dokni sorkari aro Union Government-ni kamko raken jegala. Uamang Meghalaya a•dokni manderangko on•tisaba niata dongja. Indiba TMC dol rakbee kam ka•ani a•sel ia ge•gni ku•sikrangni bidingo Parliament-o chanchianiko dakangna sienga. Ian TMC-ni rakbee kam ka•ani a•selsa ong•chongmota. Indake ia ku•sikko 8-gipa Schedule-o ra•gatanichi, Garo aro Khasi ku•sikba a•song gimikchi niksengako man•gnok, unbaksana High Skulrango jakkalna gita man•gnok aro competitive exam-rangoba second language dake jakkalangna man•gnok. Indake a•dokni bang•a manderangna kamba ong•katgnok. MDA sorkari maming dakeba ia obostani bidingo ja•ku de•ja” ineba ua agandapataha.