Gari a•sel ong•e sigipa me•chikni adatang gario dongpagipa sakgittam manderangni kosako badi ka•a
Tura, May 11, 2022: Re•anggipa May 3 tariko Rari Anty Dakaiti (AD) Camp sepango donggipa Bollonggre songo Bolero gari a•sel ong•anio saksa bilsi 18 ong•gipa me•chik Tra Chisil M. Sangma janggitangko gimaataha.
Gari a•sel ong•anio sianggipa me•chikni adatang nogipako rim•sruke ra•angenba til•ekdraani ja•mano so•ote galaha ine chanchipanio Chisil M.Sangma-na kakket bichalko on•china dabie,Tura Women Pulis Station-o badi ka•angaha.
Me•chikni adatang Tejang Sangma-ni badi ka•anio janapatani gitade, uni nogipa Chisil Sangma, Tura Dakkopgre Burny Hills gittimo nok para ra•e dongenba Tura Matchakolgre gittimo donggipa English Mission Skulo klas IX-o poraiengachim. Ua May 3 tarik pringni 2:15 bajimango Rari AD Camp sepango donggipa Bollonggre songo Bolero gari a•sel ong•anio siaha ine Rari AD Camp-ni pulisrang koborko on•ataha.
“Chingna Rari AD Camp-ni pulisrang call ka•atenba angni nogipa Chisil Sangma-ni siako kobor on•ataha. Chinga kobor man•soe jagokmanpilaha aro bakan a•sel ong•gipa biap Bollonggre songona chawatangaha. Chingni a•sel ong•gipa biapona sokangahaon, angni nogipani manggisiko garioniko ra•ongkatsoaha aro uko plastik gisimo romrome Rari AD Camp-o pick-up gario gate donsoaha, mikkang mangmangkoba nina on•jaha. A•sel ong•gipa biapona re•ange nion chinga Bolero gari registration nombor ML 07B 9610-ko nikeaha. Rari AD Camp-ni pulisrango a•sel ong•ani bidingo tale ma•sina sike sing•sandianiko dakahaon, Baghmara Pulis Station-o Pulis ka•enggipa saksa Waiting R. Sangma unbaksa A•chik pulis saksa aro Rabha saksa a•sel ong•gipa gario dongchapachim, indiba uamang bang•e saknaako man•jaha ine chingna aganaha. Waiting R. Sangma aro uni ripeng sakgni angni nogipa Chisil Sangma-ko rim•sruke ra•angenba drae til•ekesa so•ote galaha. Uamang Baghmara Suprentindent of Pulis (SP)-ni Bolero gariko ra•ange angni nogipako rim•sruke ra•angna nanga. Angnj nogipa saksa poraienggipa ong•e, maina Rari jolchi me•asarang baksa re•anggen, ianon rongtale ma•sina man•a. A•sel ong•gipa biap aro garini nosto ong•aniko nikani gitade, darangba on•tisa matgiloke jokna gita man•jawa, bilonge saknaako man•na kraa, angni nogipa saksande a•sel ong•ao sijawa, uamang sakgittamoni maibade ong•na kraa. Indiba dosko dakgipa sakgittam manderang indakpile gari nosto ong•ako man•o mangba on•tisasan mata buako man•aia, ian bebe ra•na krapilgijani kam ong•a. Uamang angni nogipako rim•sruke ra•ange til•ekdraenba so•ote galani ja•mano an•tangtang jokatna gari a•sel ong•ako pa•sikaha. Post Mortem ka•ani ja•mano ang nogipani manggisiko chingna pakwatataha aro uko May 4 tariko East Garo Hills a•jani Rengregre songo gopaha. Dos dakgipa manderangko rim•e kraa gita sastiko on•na nanga aro angni nogipana kakket bichalko ra•bachongmotna nanga” ine sianggipa me•chikni adatang Tejang Sangma dabiangaha.