Shillong, July 17, 2022: Emergency Management and Research Institute (EMRI) Company July 18 tarik Sombar pringoni kamrangko ka•gija jingjengatanirangko ong•atanggen ine parakataha.
Uamang kamrangko dontonggenchimode, Company-ni kamrango bang•a man•dikani aro EMRI service-ko nangchongmotenggipa manderang neng•nikanirangko chagronggen ine Company-ni dilgiparang mol•molangaha.
Indiba Meghalaya EMRI Workers’ Union (MEMRIWU)-ni dilanichi jingjengataniko ong•atangna tik ka•aha.
Union-ni dilgipa saksa Microlina Syiemlieh kobor ra•timgiparangna u•iatengon, “Chinga July jani 18 tariko pring 4 bajioni jingjengatanirangko dakanggen. Chinga sorkarina kanta 72 somoiko on•enba company-ni soi ka•grikgimin aggreement-ko ra•galchina mol•molangaha, indiba chingni somoi on•ako uamang dal•nikja aro chingni dabiako knachakja. Chingni Union, National Health Mission (NHM)-ni Joint Managing Director-ko grongenba Sombar salo jingjengatengani gimin Managing Director baksa gnigipa changna chanchianiko dakanggen ine ku•rachakaha.
Batanggimin somoirango chinga changni chang NHM baksa agangolpogrikaha, indiba uamang knachakja” ine u•iataha.
Union-ni agan-ku•pattigipa (spokesperson) Roypar Kharaswi EMRI-o kam ka•enggipa manderangna chu•onga gita on•na man•jaha. Uni gimin uamangni sorkari baksa soi ka•gimin agreement-ko ra•galna nangchongmota ine aganangaha.