Tura, Feb 26, 2023: February 27 tariko ong•atenggipa Assembly Election-o kam donatako man•ne 44-Raksamgre elakkani ning•o ga•akgipa Jangrapara LP Skul Polling Station-ona re•angenggipa gari Sonibar attamo rasong gribee, Photamati-o a•sel ong•aha ine West Garo Hills a•jani District Election Officer koborna u•iataha.
Rang•gitik a•sel ong•anio polling official saksa skoo bilonge saknaako man•aha aro sakgipin polling officialrang aro chel•chakgipa dolrang saknaako man•tokaha ineba u•iataha.
A•sel ong•anio saknaa man•giparangko bakan Tikrikilla CHC-ona ra•angaha, indiba bilongbate saknaa man•gipa sakgni polling officer-rangko Goalpara hospital-ona watataha. Uni ja•mano saksako Guwahati-ona watatahachim, indiba rasong gribee rama tong•saon janggi galaha ine u•iataha.
Koborna u•iatani gitade, a•sel ong•anio janggitangko gimaatgipa Chesan Ch.Marak, Tura Chandmari-oni Gambegre Block-o MGNRGS-ni Technical Assistant ong•engachim.
Indake rang•gitik a•sel ong•anio pollingni bosturang aro EVM, VVPAT-ko Sector Magistrate, Senior Pulis Officer aro CAPF-ni dongpaanichi naljoke rakkina man•aha aro CAPF-ni dilachi polling station-ona name sokatangna man•aha ineba u•iataha.