EKH, DC-ni kosako matnange social mediao gatatgipa mandeko rim•a

Shillong, June 20, 2021: East Khasi Hills a•jani Deputy Commissioner, Tra Isawanda Laloo-ni kosako matnange ong•gija kattarangko see Social Media-o watatgipa Donald Shylla-ko, pulisrang East Jaintia Hills-oniko Sonibar salo rim•aha.

Indakgipa tol•e matnanganirangko je mandeba mikkangchi Social Media-rango gatate kratcha•ataniko dakjachina mikkrakatangaha.

Ia a•selni bidingo Sein Kur Shylla Khasi Jaintia (SKSKJ) dol Sonibar salo online gita Executive Meeting-ko ong•ate chanchirimaniko dakenba Donald Shylla-ni Isawanda Laloo-ko matnange social mediao gatataniko raken jegalangaha.

SKSKJ dolni Padot Pyrkhat Shylla-ni songbad-na seachi u•iatani gitade, pilak Shylla ma•chongni manderang suk ong•gijaniko parakatenba dosi dakgipa Donald Shylla an•tangni kam cholon namgijako mesokaha ine uni kosako raka sastiko on•china janapataha.

Uandakgipa dam gri aro ka•namgijagipa mandena, Shylla ma•chongni gitade maming dakeba chakaniko on•jawa ineba parakataha.

Isawanda Laloo saksa IAS Officer ong•e re•dilanichi aro uni rakbee kamrangko ka•anichi maming namgijako da•o dipet ra•bakuja, uko tol•e matnanganiara gisik griani kam ong•a ineba P.Shylla janapataha.