Shillong, Feb 8, 2023: Sutnga-Saipung elakkani NPP Candidate Santa Mary Shylla, adita membor-rang NPP doloni ong•katgenchimoba, maming gimaani dongja ine koborna parakaha.
NPP candidate Santa Mary Shylla baksa adita ma•sisretgrikaniko namatna man•jae, East Jaintia Hills a•jani sak 23 membor-rang President Dr JW Dkhar, General Secretary Monlang Ladong, Assistant Secretary Kormon Bamon, NPYF District President Grimlang Dkhar, Vice President Kmai Tangliang, General Secretary Aibor Sukhlain aro 18 membor-rang NPP doloni ong•kataha ine koborna u•iataha.
Uni gisepon Shylla Byndihati songo tom•aniko ong•ate, jinmana aganprakengon, “Doloni ong•katgipa sak 23 manderang chingna maming gimaaniko ra•bajawa. Uamang maming dakeba dolni gipin membor-rang baksa bakrimna tom•anio bakko ra•ja. Uamangni dolko wate re•anganiara chingna namgnisa ong•a” ine aganaha.
Byndihati songo tom•anikoong•ate, MDC Seiborlang Shadap-ko East Jaintia Hills a•jani gital NPP-ni President songaha. Dr Sankey Shangpung-ko General Secretary aro Joinriwell Pyrtuh-ko Working President songaha.
NPYF, East Jaintia Hills a•jao Emlangky Lamare-ko President, Rio Shadap-ko General Secretary, Defender Pakem Kharmiki Dkhar-ko Working President aro Daiapherba Lamare-ko Vice President, Merary Sutnga-ko Assistant Secretary songskaha.
Sutnga Saipung Block-o Syrsse Lamare-ko President, Metipha Supooh-ko Assistant Secretary, Romeo Pdung-ko NPP Narpuh Circle-ni Vice President songaha ineba u•iataha.