Resubelpara, July 6, 2022: North Garo Hills a•jani Dainadubi songni manderang re•anggipa July 4 tariko Dudhnoi Pulis Station-o ong•a obostako raken jegalataha.
Dainadubi songni manderang, Dudhnoi Pulis Station-ni pulisrang aro Bichilaral songni saksa Dhrubananda Choudhory-ni kamko raken jegalataha. Je manderangan July 4 tariko Dudhnoi Pulis Station-o ong•anggipa obostao jak dongachim, uamang sakprakko niamo pangchake sastiko on•china dabiangaha. Ian skanggipa changna Pulis Station-o dosgri me•chikko dokpetpete saknaataniko nikna gita man•aha ineba uamang janapataha.
Duko ga•akgipa me•chik an•tangna kakketgipa bichalko ra•bana gita uko kragija doke satte rogipa pulisrangni kosako Goalpara a•jani Suprentindent of Pulis-na badi ka•e lekka sedoataha.
Indake uni janapatani gitade, “Dudhnoi Pulis Station-ni pulisrang, angko aro angni segipa Sengkal Marak-ko Dudhnoi Pulia Station-ona okamataha. Uamangni okamatako man•soe, chinga Dudhnoi PS-ona re•angaha aro attamni 2 bajio sokangge mai miksongao aro maina chingko okamataha, uko sing•eaha. Pulisni aganchaka gitade, Bichilaral Path-o dongenggipa saksa Ataknanda Choudhory-ni depante Dhrubananda Choudhary June 25 tariko Dudhnoi Pulis Station-o uni segipa Sengkal Marak-ni kosako badi ka•aha. Dhrubananda Choudhory-ni badi ka•anio janapani gitade, 2021 bilsini February 24 tariko ua Sengkal Marak-na tangka gong hajal 95-ko on•ne ton 29-30 koilarangko una ra•ange on•china aganaha. Indiba angni segipa Sengkal Marak da•onaba ua tangkako chotpilkuja aro koilakoba ra•ange on•kuja” ine janapaha.
Chingni Pulis Station-ona sokangon, Dhrubananda Choudhory aro uni manderang Pulis Station-o dongsoaha. Uamang Pulis Station-o ching sakgniko dagrange, ka•mikkenatenba, katta seltagijarangko aganne chingko saiaha. Dudhnoi Pulis Station-ni pulisrang aro Dhrubananda Choudhory, chingko tangka lak 20-ko gamchina aganaha. Chinga ua somoio gittik gittak indita tangkako baniko on•na man•gen, angni bag-o bi•sarangni skul fees-rangko gamna ra•bitgipa hajar 50-san dongaia ua tangkako nangnika ong•ode on•genchim. Unon pulisrang aro Dhrubananda Choudhory chingko go•olchi aro jakchi doka baksana ja•achi gatinge roaha. Uasan ong•aigija uamang Non-Judicial Stamp paper-rango aro blank paper-rango drae chingko soi ka•ataha aro angni bag-o donggipa tangka hajar 50-koba ra•aha ine badi ka•anio janapaha.
“Indake attamni 3 bajimango pulisrang angni segipako tangka lak 20-ko sandie ra•bachina watataha. Indake angni segipa ong•katangani ja•mano Dhrubananda Choudhory, pulis me•chik constable saksa Mamta Joshi-ko okamate gipin pulisrang angko go•ol, cable wire, jakchi aro ja•achi ga•tinge dokaha aro angni be•en bimangko kragija dangtape roaha. SI Bishnu Newar, Dhrubananda Choudhory aro adita sak pulisrang niam gri angko PS-o chipchange angni be•en bimangko dangtape roaha aro an•chi pari nikple doke satte roaha” ineba ua janapataha.