Shillong, September 7, 2022: East Khasi Hills a•jani Anti Narcotics Trafficking Force (ANTF) aro Laitumkrah Pulis Station ni karimskarang monggolbar attamni bak o Laitumkrah gittimni bang•a bi•ap rango operation ko ong•atangaha.
Indake operation ni somoio uamang ge•sa local taxi ML 05 K 4437 ko rim•aha unbaksana bilsi 28 onggipa Debojit Ghosh aro Badondok Marwein, bilsi 29 onggipa Ibapynhun Marwein, bilsi 26 onggipa Macdonald Khongmalai ko rim•aha. Uamango heroin gram 13.54 gnangchim unbaksana vials ge 154, mobile phone ge gittam aro uamangni jakkalenggipa local taxi koba pulis dolrang seized kaangaha.
Uamangna drugs sualtimgipa bilsi 32 onggipa Deepika Roy ko Laitumkrah Main Road oniko rim•aha jean Pulis dolrangko bilsi 25 onggipa Archana Roy ni nokona dilangaha. Archana Roy ni nokko sing•sandianiko dakoan pulis dolrang heroin gram 57.47 ko, tangka gong lak 1 hajar 94, aro mobile phone ge•sako man•aha jekon uamang ra•sekdrae ra•aha.
Uasan ong•aigija pulis dolrang Deepika Roy ni nokoniko sandirikote niani ja•mano uamang sona gram 256.36, heroin rangko gram 66.67, aro tangka hajar 19 ko man•angaha. Indake pulis dolrang monggolbarni apsan salon sing•sandianirangko dakenba heroin 137.78 gram, tangka gong lak 21,4075, unbaksana sakgittam me•chikrang aro sakgittam me•asarangko rim•dapaha.
Ia obostani bidingo Pulis dolrang Laitumkrah PS o, Case No 126 (09) 2022 U/S 21 (b) /25/ 29 NDPS Act o pangchake badi kaangaha.