Tura, December 7, 2021: West Garo Hills a•jani Tikrikilla Pulis Station-ni ning•o donggipa Dotronggre, Belguri songo silai ra•bitgipa ma•sina man•gijagipa manderang sakgni an•tangtangni mikkang aro skoko katipe re•baenba saksa Ningson N.Sangma-ni noko Sombar walni 8 bajimango nape uko goe so•otangaha ine kobor man•aha.
So•otako man•ne sianggipa Ningson Sangma-ni jikgipani u•iatani gitade, Sombar attamni 8 bajimango uni segipa mi cha•mane uamangni nok babilsi sambao neng•take roengmitting somoio silai ra•bitgipa manderang sakgni uamangni mikkangko pindape segipani neng•take roenggipa sambaona re•bae nokko wilwile changdulaha. Indake mande so•otgipa dolrang nokni depante demechikrangko nokoni ong•katgija jrip nape dongchina domki on•aha aro maikoba dakna jotton ka•ode goe galgen ine ka•mikkenataha.
Indake ua denggu manderangoni saksa “Nang•kon nangenga, bachi kate jokgen da•alde” ine aganne rang•san an•tangni ra•bitgipa silaichi goaha. Unbaksana ua manderang goako man•ns siani ja•manoba sigipa mandeni gitokko matsramgipa silchi darechi ragekani ja•mano uamang katangaha ine sianggipa mandeni jikgipa u•iataha.
Indake a•sel ong•ani ja•man Mongholbar pringo Tikrikilla Pulis Station-na koborko u•iataha. Kobor man•soani bakan Tikrikilla Pulis Station-ni pulis officer a•sel ong•gipa biapona re•angaha aro am•sandianiko a•bachengataha ineba u•iataha.
Ia misilbegipa a•sel ong•ani bidingo Tikrikilla jolni Association of Nokma & Gaunbura (ANG)-ni Convenor, Walseng N.Sangma raken jegalataha aro ka•saninggija skatang mande so•otgipararangko ta•rake sandienba rim•china dabiangaha.
“Chingni nikanio bilsi brigipa ramram mandeko denggu manderangni so•otaniara namen ka•namgijani aro kragijani kam ong•a. Indakgipa kamara mandeni jat ong•ja aro ia kenbegnigipa a•sel ong•aniara jolni manderangna namen kenjagokataniko ra•baha.
Indake ka•saninggija so•otanichi manderangni gisiko namen jajrenge kenchipchipaniko ong•ata. Jolni manderang tom•tomaniko nanga, so•sojengjeng ong•atanikl nangja” ine Walseng Sangma janapataha.
Indakgipa a•sel ong•aniara ka•saningijani kam ong•a ine ka•namgijagipa denggu manderangni kamko ANG aro AYC raken jegalataha. Dos gri ramram mandeko so•otaniara aiao inmanani aro jagokmanpilani ong•a, indake namgijagipa kamko gimikchin chugipa gadangoni gitaba jegalgrimna nanga.
“Ia a•selni bidingo namedake aro gimikchikon sandie dos dakgiparangko ta•raks rim•enba mande so•otani skanggipa mamlao donate raka sastiko on•an baksana kakket bichalko on•na nanga aro a•jao tom•tomaniko ra•bana nanga” ineba ANG aro AYC dabiangaha.