Shillong, January 17, 2023:Meghalaya Sorkari Tourism Department baksa Shillong Viewpoint (Upper Terminal), East Khasi Hills-oni Forest Nursery Rait Laban-ona (Lower terminal) Ropeway-ko tarianichi dingtang ramako tarina manchiaha.
Ia Ropeway-ara Meghalaya a•doko skanggipa changna tarina miksongani ong•a.
Skotong Minister Conrad K Sangma “A•ako pakwatani” ko dake Sombar salo dilaha. East Khasi Hills-ni nitogipa Shillong Peak-o ong•atna ru•uta salrangoni niksamsoaha.Indakgipa kamko sorkari skanggipa changna dongenggipa a•bachengataha.
Ia Ropeway Project-ko 1.34 Hectare a•arango tarigen aro iani koros Kror 138.00 mang ong•gen ine parakataha. Ia Project-ni bakranga Lower Terminal Point (LTP) jean da•o dongenggipa Forest Nursery Rait Laban biapo 11146.96 sq.m, 838 m MSL-ni kosako tarina tik ka•aha. Iano Station Building, Concourse, Maintenance Room, Ticket Room cum Office, Store Room, Security Room, Waiting Area, Public Convenience aro Parking Area donggen.
Gnigipa Upper Terminal Point (UTP) jekon manderangni songdonggipa songo 2025 sq. m, altitude 1633 m MSL-ni kosako tarina tik ka•aha. Iano Station Building, Concourse, Ticket Room cum Office, Maintenance Room, Waiting Area, Food Court, Public Convenience aro Cabin Parking donggen. Ia Terminal Point-rangna agreba, ge 9 Tower-rang donggen, jekon 251.17 sq.m. a•ani kosako tarigen. Ropeway-ranga Cable ge•sanchi okna man•ne tarigipa ong•a, jeon chu•gimik chipgipa Gondola donga aro unbaksana an•tangari chipgipa aro ogipa do•garang. Ia Ropeway Alignment-ara ge•san dakgipa ong•gen aro a•palchini rona re•bagipa manderang Shillong jillako pilakchin nitoe aro chu•gimik nikatna gita man•gen.
Tom•anio Conrad K Sangma, “Tourism-ara a•dokni mingsa nangchongmotgipa bak ong•a, jean a•dokna bang•a on•gilanirangko dakenga aro songo noko donggiparangna bading chiwalaniko bang•bate dakna cholko on•ani ong•a. Chinga Homestay scheme-koba a•bachengataha, jeni ning•on ge 2500 homestay-rangko a•dokni dingtang dingtang biaprango rikenga. Chinga iako dakenggipa manderangna mandeskako sokachakanio dakna nanggnirangko skie on•enga. Chingni jako ra•e ka•enggipa gipin kamrangara five-star hotel-rang aro luxury vehicle scheme-rangko oprake on•anian ong•a. Iarangko dakanichi hajalni hajal kam ka•ani cholrangko songrango aro jillarango bikotna man•gen aro iarangchin Meghalaya-ko mingsinggipa biap ine manderangni re•bana namnikgipa biap ong•atgen.
Ropeway-ko tarianiara chingni mingsa manderangna gadoe nianiko tarina jotton ka•anj ong•a. Anga Rait Laban Dorbar Pyllun-ko ia Ropeway Project-ko tarina gita a•ako on•anina mitelna sika” ine aganangaha.