Tura, December 3, 2022: A•gilsak gimikchin Disable ong•gipa manderangni sal ba International of Persons with Disability-ko maniengon, West Garo Hills a•jani Skotong Songjinma Tura-oba maniangaha.
Ia disability day-ko Sonibar salo Tura songjinmani Montfort Centre for Education-o maniangaha, jeon WGH a•jani Deputy Commissioner, Swapnil Tembe, mongsonggipa sokgipa ong•e bakko ra•angaha. Unbaksana District Medical & Health Officer-rang, District Legal Services Authority, Montfort Centre-o poraienggipa chatro chatrirang aro skigiparangba bakko ra•angaha.
Ia manianiko District Social Welfare Department, District Legal Services Authority aro Montfort Centre For Education nangrime ong•atangaha.
“Transformative Solutions for Inclusive Development. The Role of Innovation in Fuelling an Accessible and Equitable World”-ko katta bichong donne maniangaha.
Ia manianio DC jinmana aganprakengon, “Anga ia manianio disable ong•gipa bi•sarangna skie on•enggipa skigiparangko dingtangmancha mittelna sika. District Administration aro District Social Welfare Department-ba nangrime dakchakanirangko on•anggen. A•dok sorkari campaign-rangko a•bachengataha, jedakode disable manderang institution-o aro office-rango kamrangko ka•engon, uamang maming dakeba neng•nikanirangko chagrongna nangjawa. Uamangna dingtangmancha 4% percent-ni gita kamrang reservation donga” ineba aganangaha.
District Social Welfare Officer, Hemaritha Ch Sangma, “Ia salko an•ching dingtangmancha Disable ong•gipa manderangna apsan aro darangnaba komija u•iatna miksonge manironga. Uamangna rokomanti scheme-rangba gnang jekai Scholarship Scheme, Uniform aro Book Grant, Disable Pension Scheme, jekon da•o CM-Care ine mingskaha aro ia CM Care-ni gita ja-anti gong 500 ba 750, Klas 12-ko pass ka•gipa chatro chatrirangna Non- Employment Allowance hajar 12-ko bilsiprako on•enga. Disable ong•gipa manderang, Tura Civil Hospital-ona re•ange, Disability Certificate aro Unique Disability Identity (UDID)-rangko tarie sorkarini dakchakaniko man•gen ine parakangaha.
DLSA-ni Panel Lawyer aro Legal Aid Counsel, R K Marak sorkarini on•enggipa dakchakani bidingo jinmana talate on•anggaha aro ia dakchakanirangko ra•china didiangaha.
Mongsonggipa sokgipa aro gipin Officer-rang nanga bosturangko disable ong•gipa manderangna suale on•angjolaha.
Ia salko manianio Montfort Centre-ni bi•sarang git ring•an baksa chrok mesae jinmanako an•soatangaha.