Dikkanchi Shira niam gri ro•ong gatprete salni gimin Session-o sing•doanga  

Shillong, Sept 13, 2022: Mahendraganj-ni MLA aro TMC dilgipa Ma Dikkanchi D.Shira Bangladesh a•songona niam pe•e rong•te salgipa truk garirang nangana bate ro•ongrangko gatprete salengani gimin Monggolbar salni Autumn Sission-o sing•doangaha.

Bangladesh a•songona rong•te salgipa trukrang weight bridge ba jrimako togipa dollongrangko chu•onga gita rikjani ba donjani a•sel skatang ro•ongrangko gatprete salanichi namgipa rama sorokrang nosto ong•aha aro simsakgija ta•rakprete salenba bang•a manderangni janggirangko gimaataha ineba ua agandapangaha.

“Salanti bol 100-na bate truk garirang ro•ongrangko gatprete Mahendraganj-oni Bangladesh-ona salruraenga. Truk gari bolprakna Metric Tone (MT) 12-kosan gate salna on•achim. Indiba truk bolprakon nangana bate MT 30-40-ona gatprete salenga. Uni gimin chu•onga gita weight bridge-rangko rike ba songe on•na nangchongmota. Truk garirang maikai niamni kosako gatprete rong•terangko salskaenga” ine Ma Shira Autumn Session-ni gittamgipa salo sorkario sing•doangaha.

Apsadake Salmanpara-ni MLA Pa Winnerson D.Sangma, skulo poraienggipa bi•sarang an•tangtangni, Right to Education-ko ba poraigniko bon•chongdikatani gimin chong•mot a•selko Session-o a•dok sorkariko sing•doangskaha.

TMC MLA Winnerson D Sangma, MDA sorkariko iani bidingo raka ku•rangchi deficit skulrango skigipa aro kam ka•enggipa kusi ong•e kam ka•na man•jaenga, uni gimin, uamangni je man•gnirang health aro medical allowance-rangko on•dapna nanga ine aganangaha.

Dingtang dingtang sorkari skulrango skigiparang gri chalaiengani gimin aganangengon, “Skigipa saksan bang•a sorkari skulrangko chalaienga aro bi•sarang an•tangtangni poraianio chu•sokna man•gija, an•tangtangni Right to Education-ko gimaatenga, uni a•sel bi•sarang uamangni Fundamental Rights-ko jegalaona sokenga” ineba ua agandapangaha.