Ampati, June 22, 2022: Adita salrangna dongdipgija mikka waanichi a•dokni bang•a biaprango a•arang rudapani aro chi bannanichi neng•nikaniko man•tokenga.
Indake ong•engon, AITC-ni MLA Ma Dikkanchi Shira aro doltangni dilgiparang baksa elakkatango chi bananichi nosto ong•gipa songrangko Sombar aro Monggolbar salo re•ange niangaha.
Ma Shira, South West Garo Hills a•jani Mahendraganj elakkani ning•o donggipa Kalaichar, Lukaichar, Ulubari, Gofrai, Paglipara Katuli, Kuligaon aro Kalaigaon songrangona re•angaha.
“Chinga Meghalaya TMC dolni ka•rimskarang baksa mikka jimbee waanichi nok jamrang nosto ong•e, duko ga•akenggipa manderangko grongeaha. Je obosta ong•oba uamangko watgaljawa aro uamangni neng•nikanirangko chel•atna dongdikgija kamko ka•anggen. Chingni ka•rimskarang a•dokni kona noksik pilak songrangchi re•ange manderangna dakchakanirangko sokatna kamko ka•enga” ine Mahendraganj-ni TMC MLA Dikkanchi Shira aganangaha.
A•dokni lak 5 manderang chi bannani aro a•arang rudapani a•selo neng•nikanirangko man•tokaha. Meghalaya TMC, sorkarini warachakgipa dol, gimik cholko ra•enba duko ga•akenggipa pilak songni nokni manderangna dakchakaniko on•na kamko ka•enga. Indakmiting somoio an•ching pilak manderangan apsan ong•e saksa sakgipinni dukko nigrike ma•sichakgrike dakchakgrikna nanga ineba ua agandapangaha.