Tura, September 6, 2022: Dadenggre-ni NGO-rang changsatai apsan nangrime Dadenggre Civil Sub-Division-ko District-ona ra•doe on•china dabiangtaiaha.
Dadenggre jolni nangrimgimin NGO-ranga, GSU Zonal Headquarter, FKJGP, AAYF, aro FAF ong•achim.
GSU Western Zone North, Dadenggre-ni President Tengsan Marak, “Batanggimin chango sorkariko rikanggipa MDA sorkari aro da•o MDA sorkariko rikenggipa dolni kamrangko jegalangaha. An•chingni dilgiparang indita bilsirangna Dadenggre songni jumangko bimang pil•ate on•kujaenga. Dadenggre Sub Division-ko 1982 bilsion songaha. Indake 1999 bilsioni da•alona kingking gital a•ja na District-ko on•china krenge dabienga. Chingni Memorandum segatgiparangko uamang poraie nisrangja, chingni dilgiparang baksa ia obostani bidingo janapaniara indinsa ong•ramaiaha. Uamang chingko cha•boke kusiniko man•ahama. Indiba uamangni sal somoirang sepangbataiengaha. Uamang chingonan re•bae bang•a tangdodapaniko ra•bana ku•mitchete vote gillamtaignok. Indiba ia chango chinga uamango bang•a sing•doanganirangko dakanggen. Bilsi bongani gisepo na•simang chingna maiko dakaha, songna mai tang•dodapaniko ra•baaha, na•simangni sokatgipa scheme-ranga baosa, gital a•ja ba District-ara baosa. Chingni sing•anirangna uamang aganchakaniko on•na nangchongmotgen. Chinga Politician-rango maming dakeba ka•dongna man•ja. Dadenggre Sub-Division namen gitchambegipa ong•a, Resubelpara aro Ampati-ko niatgenchimode, Dadenggre-an gitchambatsranggipa Sub-Division ong•a. Uni gimin chinga sorkariko changsatai chingni dabianirangko knachakchina mol•molna sika” ine aganaha.
AAYF Dadenggre Regional Unit-ni Secretary Pinon Marak, “MDA sorkari jatna a•dokna rake kam ka•na ong•na nanga. Uamang jinmani nangnikanirangko sing•sandie chu•sokatna nanga. Uni gimin ia chango chinga jinma apsan dabitaienga aro sorkari chingni dabianiko be•en pil•ate on•na nangchongmota” ine aganaha.
FKJGP Dadenggre Circle-ni Secretary, Walchang Sangma, “Sorkari pangnan a•dokna aro manderangna kam ka•na nanga. Indide chingni MLA James Sangma-ra maina maming kamnaba ja•ku de•jaenga. James Sangma aro Conrad Sangma, na•song adasa tusiaoni chakatboha aro a•dokni manderangna kamko ka•boha” ine aganaha.
FAF-ni Secretary Starson Sangma, Sorkari Dadenggre Sub-Division-ko ia changde a•ja songe on•telna nangchongmota. Badita bilsirangna sorkari nachil songjaenga ine ku•rang on•atskaha.