Tura, July 18, 2022: Garo Students Union (GSU) Western Zone (North) Dadenggre-ni President Tengsan M.Marak Dadenggre CHC-ko re•ange nirok sandianiko dakangaha.
GSU WZ-ni President Tengsan Marak-ni u•iatani gitade, bang•a manderang Dadenggre CHC-ko namdapatna aro kamrangko name ka•na nangchongmota ine agananirangko knae nirok sandina re•angaha. Indake uamang CHC-ni incharge, Dr. D Marak-ko gronge Dadenggre CHC-o sanna banani bosturang chu•onggijani bidingo agan-janapangaha. Indake CHC-o sanna gita chu•onga bosturang dongjani a•sel uamang bang•a neng•nikanirangko chagrongenga ine u•iataha.
“Dadenggre-o donggipa CHC-ko gimikni gitan namdapatna nangenga. Dadenggre elekka-ni MLA an•tangan a•dokni Health Minister ong•enga. Indiba ua an•tangni CHC-o mai bosturangko nangenga aro mai chu•ongjaenga uarangko re•bae sing•sandiani dongja. Dadenggre CHC-o dingtang Operation Theatre (OT), X-ray machine dongja aro chu•onga gita laboratory facilities-ba dongja. Health Minister aro Dadenggre-ni MLA ia obostani bidingo nirok sandina nangchongmota aro jinmani namgnina CHC-ko ta•raken nambatatna nanga” ineba ua agandapataha.