Tura, March 12, 2023: A•dokni Skotong Minister Pa Conrad Sangma Undergraduate (UG)-rangni CUET porikkako ra•galchina mol•mole, Union Education Minister Dharmendra Pradhan-na lekka sedoataha.
Pa Conrad Sangma-ni janapatani gitade, Meghalaya a•doko batanggimin salrangosan election-ko tom•tome, matchotataha. Jeni a•selan a•dokni Board Examination-ko pangna bilsi gita apsan somoio ong•atna man•jaha. MBOSE porikkako sea matchotani bakan chatro chatrirang CUET porikkako sena nanggenchimode, uamang CUET porikkana tarisamsona chu•onga gita somoi dongja ine u•iataha.
“Chinga Meghalaya a•dokna dingtangmancha, State University-ko bikotna sienga. A•dok sorkariko chingni mol•molaniko knachake ra•chakgenchimode, chinga ta•raken, State University-ko chadamberangna bikote on•gen. A•dokni bang•a college-rang North Eastern Hill University (NEHU) jean Central University ong•achim, ia University-osa affiliate ka•toka. Iani a•sel a•dokni chadamberang CUET porikkako sena nangao ga•akenga. Re•anggipa bilsio Union Education Minister, chingni mol•molaniko knachake Undergraduate (UG)-rangni CUET porikkako ra•galaha. Apsandaken ia bilsiba ua a•dokni bi•sarangni neng•nikaniko ma•sie, chingni mol•molaniko knachake CUET-ko ra•galgen ine ka•dongsoenga” ine Conrad Sangma aganaha.
A•dokni gital Education Minister Rakkam A.Sangma a•dokni Skotong Minister Conrad Sangma-na lekka sedoate, UG-CUET porikkako ra•galchina mol•molangaha. Jekon Pa Conrad Sangma knachake poraienggipa chatro chatrirangni neng•nikanirangko nike, Union Education Minister Dharmendra Pradhan-na lekka sedoataha.
Pa Rakkam A.Sangma Education Department-ni dilgiparang baksa tom•e chanchirimaniko dakaha.
“A•dokni Education System-ko tang•doatna aro namdapaniko ra•bana rakbee kamrangko ka•na nangenga. Bang•a skulrango skigiparangko rakkina gita nangenga. Uasan ong•aigija nambata skul nokrango poraina chol ong•pana gita, skul nokrangkoba nambate taridapna nanggen ” ine Pa Sangma aganaha.