Resubelpara, April 3, 2022: Constitutional Rights Forum (CRF) dolni President Greneth Sangma, North Garo Hills a•jani Suprentindent of Police na lekka sedoatenba Resubelpara Boys Secondary Skul o Hindi ki•tap ko skienggipa Tengme G. Momin ni kosako badi ka•aniko dakangaha.
“Tengme Momin, Resu Tekachang o songdong a•chaenga aro ua Pa Timothy D Shira ni demechik ba ong•a. Ua Resubelpara Boys Secondary Skul o Hindi ki•tap ko chatro rangna skienga. Indake ua klas 7 ni chatro saksako Hindi oikor ko poraina man•jani gimin dokaha. Doka man•e sa•dike an•chi kame dongenggipa chadambeni ja•chipchangko Social Media o wate viral ong•atana klas 7 ni sak bri chatro rangko ua dokan baksana su•a ming ga•tingaha aro skul oniko a•rikgalna ka•mikkenataha. Sorkari skul o bi•sarangko dokna satna manjawa ine niamrangko ra•gatgenchimoba ua poraienggipa chadamberangko Hindi oikor ko poraina man•ja mangmang doke sate roaniara kraani ong•chongmotja aro niamni ko•sako ga•aka. Skulni chatro rang Hindi oikor ko poraina man•jagenchimode uko skie man•atna skigipani jak oan ong•a” ine CRF ni President Greneth Sangma aganaha.
Tengme Momin ni indakgipa kamrang uko skigipa ong•na kra•atja aro Pulis dolrang uni kamni kri uko harassment, mental torture aro threaten na kragipa Section o donate sasti ko on•a nangchongmota ineba ua agandapaha.