Tura, April 2, 2022: Association for Democracy and Empowerment (ADE) Apex Committee, Tura-ni President, Dalseng Bira Ch Momin, a•dokni SSA skulo skigiparangni indita jarangona dormaharangko man•gija dongengani bidingo duk ong•an baksa uamangni dabianirangko sorkari knachakchongmotna nanga ine chakpaaniko on•ataha.
“Meghalaya a•doko sak 12,541 SSA Skulo skigiparang gnang. Uamang kamtangni dormaharangko man•pana sike sorkarini kosako bang•a jingjengatanirangko ong•atan baksa duk ong•aniko mesokna ba•ra gisim nissanko songe re•jomanirang, Candle ra•e re•jomanirangko dakangahaoba. Re•anggipa 2021 bilsini December jao SSA Skulo skigiparang grappile dormahatangtangko on•china bi•aha. Uandake adita salrangna skang SSA Skulo skigiparang a•dokni Skotong songjinmao apsan obostani bidingo jinma tom•dake sorkarini kosako jingjengatanirangko dakangaha. Sorkari uamangni kosako jingjengatanirangko ong•atmiting somoio mangmangsan ku•sikchi dormaharangko on•gnok ine ku•rachakatronga, indiba a•dok sorkari ku•rachakatangko rakkigija, Skigiparangko sorokrango chrik a•bokaona sokataia” ine Dalseng Bira Momin janapataha.
Garo Hills a•jani bang•a SSA Skulo skigiparang dormaharangko chu•gimik man•ja dipetde skulrangko ka•jawa aro sorkarini ge•etako manigija skul ka•gija donggiparangko sandichina, All District Education Officer aro District Mission Coordinator-ko Director of Skul Education and Literacy ge•etangaha, jedakode uamang skul ka•gija dongenggipa skigiparangni kosako niamko ja•rike kragipa bichalko on•na man•gen.
ADE, indakgipa kamrangko raken jegala, sorkari skigiparangni dormaharangko on•jagenchimode, skigiparang bani tangkachi re•e doe kamtangko ka•na man•gen. SSA Skulo skigiparangni dormaharangko sorkari chugimikko on•na baksana mikkangchi somoi gitan skigiparangni dormaharangko on•angna nanga, jedakode skigiparang maming neng•nika gri janggi tangpana man•gen ineba Momin agandapataha.