Tura, Jan 27, 2023: Meghalaya aro Assam sima-arini kajia golmalko namatgen ine Skotong Minister Conrad Sangma ku•rachakenba January 25 tariko Salantini Janera-o seataniko nike ADE kusi ong•gijaniko parakataha.
ADE, President Dalseng Bira Ch.Momin-ni parakatani gitade, ua Association-ni palo, an•tangni chanchiako a•dokni manderangna parakataha.
“Anga Conrad Sangma-ni kamna mittelna sika. Ua kakketgipa dilgipa ong•genchimode, a•dok ge•gnini gisepo kajia ong•enggipa song dam 12-ni manderangna tom•tomaniko ra•bana man•ode nambegipa ong•genchim. Chinga NGO-rang Garo Hills-ni A•chik ong•pae, nangni namgipa ku•rachakanina kusi ong•a. Indiba song dam 12-oni gipin songrang Malangkona Joypur, Malang Salbari, aro Malangkona Huhuapara songrangko man•chape MoU-o soi ka•ahani gimin namen jajrengna nangao ga•akenga” ine Dalseng Bira Momin janapataha.
Ia songrango pangnaba kajia donggija skangoni dongkamgipa manderang a•doktang Meghalaya-on dongpilna man•genchim. Skangonin Malangkona jolo Nongbak A•king ba N.Sangma-ni A•king gnang ine agana. British-ni chasongonin ua biaprang Sixth Schedule-ni ning•o ga•aka aro maming jegrikanirang dongja. Indide ua songrangko maina Assam-chi on•atna nanga. Uni ortode maiba miksongani dongama ine Dalseng Bira Momin sing•doangaha.
Re•anggipa bilsini March 29 tariko MoU-o soi ka•ani a•sel NGO-rang jegale jingjengataniko dakaha. Indiba A•chik dilgiparang, NGO-rangni dabianirangko changsaba knachakja. Uni a•sel Garo Hills-ni NGO-rangko ka•donga gri ong•ata. Re•anggipa bilsini August 22 tariko Garo Hills aro Khasi Hills-ni NGO-rang bakrime Shillong songjinmao jingjengataniko dakaha. Indake salgipino Conrad Sangma NGO-rangko okame chanchirimaniko dakdilaha.
Indake ua tom•anio soi ka•gimin MoU-ko nipiltaigen ine NGO-rangna ku•rachakaha. Indiba da•alona kingkingba iani bidingo kamko ka•jaha. Uni gimin, Conrad Sangma ku•rachakatangko chu•sokatkujani gimin, NGO-rang bang•a jajaniko man•aha ineba janapataha.
Ia kajiani bidingo Conrad Sangma, Salantini Janera-o ku•rachake seatgipa kattara ka•dongna man•gijani ong•a. Eleksin-o an•tang vote man•na mangmangsa ku•rchakmikenga.
“Chinga pilak social media-rango Conrad Sangma-ni see parakanirangko nie dongenga, ua jolni manderang baksa agangolpogrikaha aro uamang Assam-chi re•angna kusi ong•en ra•chakaha, ingipa katta kakket ong•ja” ine Dalseng Bira Momin jegalatskaha.
Conrad Sangma changsaba ua songrangona re•angja aro uamang baksa maming ku•monga gri MoU-o soi ka•ani gimin, songni manderang jegale jingjengataniko dakaha, indiba Conrad Sangma-ni gisiko jattangna maming ka•sachakani dongja. Hoe beben Skotong Minister songni manderang baksa agan golpogriknaba donga, indiba ua ru•uta bilsirangonin Assam a•dok baksa ku•mongmanaha.
Assam-chi on•atako man•gipa songgitamni manderang Meghalaya-ni EPIC card-rangko ra•bite grapenga, uamangni dedrang Meghalaya-ni dingtang dingtang skulrango poraienga, songni manderang a•ani lekkarang dongachim aroba Meghalaya sorkario kam ka•e janggi tanggipa manderang bang•en gnang, indaken songtang Meghalaya-ko wate Assam a•dokchi re•angna jechake soi ka•gimin MoU-ko ra•chakna man•jawa ine jegalataha.
Uni gimin, “Chinga changsatai Conrad Sangma-na gisik ra•atpilaniko on•na sika. Chinga Conrad Sangma-ni kosako bobil dakja, indiba chinga NGO-rang, manderangni dukna pangnan chadenga aro manderangni namgnina chel•chaka. Iarang chingni skanggipa jegalani ong•ja aro chingni man•gnina daka ong•ja. Chinga bang•a changon, manderangni nangnikanina kamrangko ka•ronga aro gitcham sorkariko chalaianggipa Dr Mukul Sangma-ni kosakoba jegale dingtang dingtang jingjengatanirangko dakaha. Uni gimin duko ga•akenggipa songni manderangna chanchie tom•tomaniko ra•bapilna nanga” ine Dalseng Bira Momin mol•ataha.