Shillong, Mar 6, 2023: A•chik Chief Minister ong•aniko namnikjae, Khasi Chief Minister ong•na nanga ine HYC aro gipin dolrang dabie jingjengataniko dakengon, a•dokni Regional dolrang jekai UDP, PDF aro HSPDP rang•san, NPP aro BJP-na chakgrime sorkariko rikna bilko on•angskaha.
Indake, sak 26 NPP MLA-rangko man•chape, UDP sak 11, BJP 2, HSPDP 2, PDF 2 aro Independent sak 2 MLA-rang baksa Conrad Sangma Skotong Minister-na March 7 tarik Monggolbar salo Shillong Raj Bhawan-o ku•mikchetgen ine parakataha.
Conrad Sangma-ni gital sorkariko rikna ku•mikchetani salo, India a•songni Prime Minister Narengra Modi aro Union Home Minister Amit Shah re•bae bakko ra•anggen ineba parakataha.
Iandakgipa political game-ko kal•e, a•doko so•sojengjeng ong•ataniara, saniba man•gninasa dakma? ma badiaba political dolko ra•donasa manderangko jajaatachima ine bang•a manderang sing•doangtokaha.
Indake ong•genchimoba, Conrad Sangma-na pilak regional dolrang chakgrime bilko on•anichi adita jajatanirangko man•genchimoba bon•kamao chu•soksranggipa ong•e, gital sorkariko rikna cholko man•aha.