Shillong, September 8, 2022: A•dokni Skotong Minister Conrad Sangma aro Cabinet Minister rang tom•aniko ong•atangenba chanchirimanio Meghalaya a•dok ona Code of Criminal Procedure (CrPC) aro Code of Civil Procedure (CPC) Operation ko ra•chakenba skanggipa changna gital niamko ia a•dok ona ra•gatangaha.
Chief Minister, Conrad Sangma ni aganani gitade, uamang CrPC aro CPC ko jakalna gita ra•gatangna skang Autonomous District Council ni karimskarang baksa agangolpogrikangaha.
Meghalaya a•dokni Court Code of Criminal Procedure (CrPC), 1973 o segatgimin niam rangkon ja•rikanggen ine Conrad Sangma jinmana talate on•angaha. Gitalgipa niamrangko ra•napgenchim ong•oba District Council-ni Court rang 6th Schedule ni Paragraph 4 aro 5 o janapgimin gita uamangna ongimin bilrangko man•angkugen ineba ua agandapaha.
” Meghalaya a•dokni ning•o donggipa pilak District Council Court rang jemangan Administration of Justice & Police in the Khasi and Jaintia Hills 1937 aro Administration of Justice & Police in the Garo Hills 1937 ni niamrango pangchake rai ko on•achim aro kamrangko kaachim, uamang Code of Criminal Procedure (CPC) 1973 ni niamrangkosa ja•rikangskana nanggnok. Apsandaken Code of Civil Procedure (CrPC) 1908 ni niamrangoba chinga ontisa dingtanganikosan rabaaiaha, una agre gitcham niamrang apsan ong•e dongainga” ine Conrad Sangma aganaha.
India a•songni see jote rakkigimin niam rangoni 6th Schedule o janapani gitade, District Council Court Tribal jolrango Tribal manderangni badi kaani bidingo rai ko on•angna bil donga ine seani gnang.
Segatgimin niamrangko ja•rike nirokgipa aro ma•mong bichal ka•chakram nok jekai Supreme Court ba High Court rango CPC aro CrPC kattarangko Judge ba ukilrang jakalronga. Ia kattarang ba niamrang gitchaman ong•a jekon 1908 bilsi o CPC ko bikotaha aro CrPC ko 1973 bilsi o tarie April 1 tarikni 1974 bilsio ra•gatchengaha.
Civil Procedure Code (CPC)-o 158 Section rang gnang jeon dakna nangani niamrang aro ge•etanirang dongchapa. CPC o case rangko ba bichal ka•na nanganirangko Civil Court o ka•na nanga aro dai ba compensation ko gamna gita nanga. Iano bichal ka•aniara bang•a changon Rights ba kakketna dakgrikgiparangna dakchakani aro nengnikani ba obostarangko talataniba ong•a.
CrPC-ko Criminal Procedure Code ineba aganna gita man•a. CrPC-o 484 Section-rang gnang aro ge 2 Schedule rang donga. Ia case o dos gnanggipa manderangko (Criminals) rimnape kakketgipa bichalko ba sastiko on•china gita dabia.