Conrad Sangma chingni a•ako skatang Assam a•dokna pakwatna man•jawa: Nokma

0

Shillong, March 12, 2022: Maikhuli songni a•a damsa ko a•dokni Skotong Minister Pa Conrad Sangma songni manderango maming dakeba sing•cheng sanchenggija Assam a•dokna pakwata ine songni Nokma Pa Claydense Momin u•iataha.
Pa Claydense Momin ni u•iatani gitade, Maikhuli song Meghalaya aro Assam a•dokni sima ari o donggipa song damsa ong•a. Chingni song Meghalaya a•dokni ning•o ga•aka ine sakki ko mesokna register kagimin lekkarang gnang aro chinga an•tangtangko Meghalaya a•dokni mandean ine sakkina tarigimin caste certificate, Elektion ID card, Aadhar Card aro uandakgipa certificate rang gnang. Chinga Meghalaya sorkarini chingna ka•sae on•gilatgipa dakchakanirangkosa man•a aro changsasikba Assam sorkari chingna dakchakata dongkuja.Chinga an•tangtangsa songni ramarangko aro songko nokko taridapna kangkare kae kamko ka•enga. Chingni songo donggipa pokkri damsa jekon skango chingni Atchu Ambi tarie donangpaachim chinga ia pokkri onikosa adita tangka paisarangko man•e song nokko chalaienga. Chingni songo Meghalaya sorkarini on•gipa Lower Primary Skul ge•sa mangmang san dongaia, uana agre gipin dongpagipa skul rangko chinga an•tangtangni bilchisa kamchisa songgimik tangkarangko gile chimonge skul o skigiparangna dormahako on•enga. Atchu Ambini tarie donanggimin pokkri o chinga na•tok rangko wate uko jilenba pale simme man•pagipa tangka paisarangchisa skulko chalaienga. Iani gisepgrikon adita sal rangna skang Pa Conrad Sangma ia pokkri ko Assam a•dokna pakwataha ine chinga koborko man•soaha.

Uasan ong•aigija chingni songni gopram jean Meghalaya a•dokni ning•o donggipa a•a ga•akachim, chinga ia bi•apni bidingoba bang•a bilsion pulis station o badi ka•aha. Chingni songni sigiminko gopna jakkalenggipa bi•apko chinga Meghalaya a•dokni ning•on register ka•a indio-mangba Assam sorkari ia bi•apko ra•sekdrae ra•na jotton ka•ronga. Uamang chingni bi•apo nok tesa ko rikdra•ate uko Batarkulsi Border Outpost ine bimung donaha. Ia obostani bidingo chinga bang•a changon High Court chi re•e doe Assam Pulis Outpost ni kosako badi ka•aniko dakaha. Chingna HC ni ongimin rai ni gitade, Maikhuli songni je mandeba sigenchimode uamang chengoni gopna jakkalchakenggipa biap on gopna gita man•aigen aro Assam Pulis ni rikdra•enggipa outpost nok rikaniko dontongatchengaha. Ia obostako chinga Supreme Court ona kingkingba ra•doangaha. Chinga six schedule ni ning•o gaakgipa Meghalaya a•dokni song damsa ong•a aro ia pokkri ba chingni a•a osa ga•aka. Songni Nokma aro Autonomous District Council ia pokkri ko Assam a•dokna pakwatani bidingo mamingkoba u•ija aro pakwatna skang songni manderangni rai koba ra•ja. Pa Conrad Sangma chingni u•ia gri aro masia gri chingni Atchu Ambini ka•sae tarie donanggimin a•ako aro pokkriko Assam a•dokna pakwata,iako chinga maming dakeba ra•chakna man•jawa aro Meghalaya a•dok o donggipa Khasi, Jaintia aro A•chik jat ko ching baksa chingni ma•a ambini a•ana dakgrikanio ching baksa cha•denge dakchakaniko on•pachina molmolna ska ine Maikhuli songni Nokma Pa Claydense Sangma aganaha.

Ka•mao on•atenggipa video-o songni Nokma jinmana talate on•enga.

 

Leave A Reply

Your email address will not be published.