Tura, April 2, 2022: A•dokni Skotong Minister Pa Conrad Sangma, Ganol chibimako skango gita apsan ong•atpiltaina miksonge Pilot Project on Payment for Ecosystem Services (PES) program-ko oprake on•angan baksana 1.20 kror tangkani cheque-ko FOCUS-ni ning•o donggipa Producer Group (PG) dolrangna suale on•angaha.
Ia tom•bimonganiko Rongram C&RD Block-ni ning•o donggipa Asanang-o ong•atangaha aro Skotong Minister-na agan-ku•pattigipa (Adviser) Thomas A Sangma, Williamnagar elekkani MLA Marcuise N Marak, Sorkarini Principal Secretary aro MBDA-ni CEO P Sampath Kumar, West Garo Hills a•jani Deputy Commissioner Ram Singh, Council of Nokma-ni President Skylance G Momin, Line Department-ni Officer-rang, Ganol chibimani wilwilao donggipa dam 20 songni Nokmarang aro songni manderang dongpae bakko ra•angtokaha.
PES-ko oprake on•engon, Conrad Sangma, “Da•ororo an•ching a•doko bang•a buring bolgrimrangko den•pee galanichi chiring chibisikrangni tipanganiko nikna gita man•enga aro iani a•sel an•ching chu•onga gita chirangko man•jaenga. Buring bolgrimrangko ripinggija uarangko den•ne galanichi janggi tangna neng•nikanirangko man•enga. Iarangko champengna gita sorkari maikoba dakna nanggen ine nikenba PES-ko ra•gataha. Ia project-ko bimang ong•atna manderang bang•a neng•nikanirangko chagrongna nanggenchimoba sorkari uamang baksa ong•gen. Ia kamrangko an•ching da•o ka•jagenchimode, mikkangchi re•baenggipa salrango bang•a neng•nikanirangko chagrongna nanggen uni gimin da•o somoio man•miting somoion pilakan apsan ja•ku de•e kamko ka•angna” ine aganangaha.
Sorkari Meghalaya a•doko 4,200 sq km a•arangko ripinge rakkiangna chanchie bol wa•arangko ge•na a•bachengatanggnok aro manderangni neng•nikanirangko chel•chakna gita dingtang dingtang department-ni dakchakanirangko sokatgen ineba agandapangaha.
Skotong Minister-ni Adviser Thomas A Sangma, Skotong Minister nama kamna miksonge re•chakatdilanina uko demittele aganangaha.
Sorkarini Chief Whip, Marcuise N Marak songni manderangko buring bolgrimrangko ripinge rakkichina didiangan baksana Ganol chibimako skango gita apsan ong•atpiltaina apsan ja•ku ga•e kamko ka•china mol•molangaha.
Ia tom•bimonganio a•dokni Skotong Minister FOCUS-ni ning•o donggipa dol 50 PG-rangna tangkani cheque-rangko suale on•angjolaha.