Shillong, July 27, 2022: A•dokni Cabinet Minister-rang Monggolbar salo tom•aniko ong•ate chanchirimaniko dakangaha.
Cabinet tom•e chanchianio, Departmental Examination-rangko ong•atangna chanchie ra•chakaha. Indake Assam aro Meghalaya a•dokni IAS Probationer-rangni porikkako Assam Public Service Commission ra•jawa, indiba Meghalaya Public Service Commission-sa ra•skagnok aro porikkako sechakram biap ba Centre Meghalaya-o ong•gnok. Unbaksana Syllabus-ko a•doko jakkalgipa ku•sikrango pangchake on•anggen ine u•iataha.
Apsan dormaha aro apsan qualification-ni kamko ge•sa advertisement-on jinmana parakna nanga ine agangipa kattarangko Cabinet-o ra•chakangaha. Bang•a changon MPSC dingtang dingtang porikkarangko aro selection-rangko dingtang dingtang somoio dingtang dingtang Department-na ong•rongatachim, jean gimikni somoioko bang•en gimaataha. Uni gimin Cabinet-o tik ka•a gita, MPSC apsan somoion dingtang dingtang Department-ni porikkarangko ra•anggen.
Meghalaya a•dok, batanggimin bilsi 50-onin Assam a•dokni Prisoner-rang Manual-kosa jakkalenga. Uni gimin Cabinet Monggolbar salo a•doktangni Prisoner-rang Manual-ko ra•chakangaha. Iano pattokko maikai rakkina nanga aro pattoko dongenggipa manderangko maikai nirokna nanga uarangko agantalate sea gnang.
Uasan ong•aigija Cabinet Minister-rang, Meghalaya District Court (Ministerial) Service Rules 2020-o janapani gita kamna galenggipa manderangni bilsiko 27-oni 32-ona on•ahachim uko baridapatna agangipa kattakoba ra•chakaha.
Cabinet, Meghalaya Local Fund Audit Rules 1996, Meghalaya Prosecution Service Rules 2016 aro Meghalaya Goods and Services Tax 2017-o janapgimin niamrangkoba ra•chakangaha.
Una agreba, Deputy Inspector of School aro Administration 1993-oni 2007 bilsiona LP aro UP skulo skina seokako man•gipa pilak Non-government skigiparangni kamko regularise ka•gnok. Indake 1993 bilsio Sorkari LP skulo skigiparangko jako ra•gopengon bang•a skigiparang Government-ona watatako man•aha indake sak 2447 skigiparang non-government-ona watatako man•skaaha. Indita bilsirangona non-government-o donge skigiparang dormaharangko sorkarini on•giparangkon man•enga. Indiba uamang pension-rangko man•jachim, indake uamangni kamko regularise ka•achi uamang sorkarini on•enggipa pilak man•gniko man•angpagnok ineba u•iataha.