Tura, Jan 25, 2023: Meghalaya BJP Butbar salo Tura Orchid Hotel-o tom•aniko ong•ate, re•baenggipa February 27 tariko ong•atenggipa Meghalaya Assembly Election-na apsan ku•monge kamrangko ka•angna gita chanchirimangaha.
Ia tom•anio National General Secretary (Organisation) BL Santosh mongsonggipa sokgipa ong•e bakko ra•angaha. Unbaksa Assam a•dokni Deputy Speaker Dr Numal Momin, BJP MLA-AL Hek, BJP State President Earnest Mawrie, Tura-ni MDC Bernard N.Marak, BJP Tura City District Committee-ni dilgiparang, dingtang dingtang district-ni BJP dilgiparang, Garo Hills-ni ge 24 elakkarango susana BJP ticketko bi•enggipa candidate-rang aro BJP dolna kam ka•gipa manderang dongpae bakko ra•angtokaha.
Ia tom•aniona sokbagipa BJP dilgiparangko Tura-ni MDC Bernard Marak mande ra•bee aro kusi ong•be rimchaksoaha. Indake tom•anio re•baenggipa election-o susana sienggipa candidate-rangni bimingrangko February 2 tariko parakatgen ine aganangaha.
BL Santosh tom•anio jinmana aganprakangengon, re•baenggipa Meghalaya Assembly election-o BJP dolna apsan ku•monge kamrangko ka•enba BJP candidate-rangko cheatchina, sakantikon didiangaha. Jedakode Meghalaya a•doko BJP sorkariko rikna man•genchimode, Meghalaya a•dokna bang•bata namroro silroroanirangko ra•bae, namgipa janggi tangani gadangko tang•doatna man•gen ineba aganangaha.
Unbaksana re•anggipa bilsini July jao Tura-ni MDC Bernard N.Marak-ko jemangan tol•e politics kal•e rim•enba pattoko chipatani gimin, janapangengon, tol•e politics kal•giparangko nie dongja aro watjawa, uamangni kosako rakgipa ja•kuko de•anggen ine BL Santosh tom•anio parakangaha.