BJP dilgiparang corruption-ni bidingo jera ra•susana maming u•iata dongja: Conrad Sangma

Tura, May 28, 2022: Skotong Minister Conrad Sangma Sukrobar salo kobor ra•timgiparangna parakatengon, CBI enquiry-ni bidingo BJP dilgiparang, angna maming u•iatani dongja ine aganaha.

“Ma•mongni BJP dilgiparang Corruption-ni bidingo jera ra•susana aro CBI-chi enquiry ka•china maming dakeba kobor on•a dongja. Ma•mong sorkarini BJP dilgiparang aro High Command-rang iani bidingo angna maming u•iata dongja” ine Conrad Sangma parakataha.

Batanggimin salrango Tura-ni MDC Bernard N. Marak Skotong Minister Conrad Sangma-ko CBI enquiry ka•china aro Corruption-ni bidingo jera ra•susana ra•biaha”.

“Skotong Minister-ko an•chingan songaha aro uko an•chingan kamoni ra•galgen. Chinga ia kamko ka•na ka•donga. Tangka mangmangde a•doko sason ka•na cholija, indiba gisik taning bite chanchina changgipa, kangal cholgrina, jatna, a•jana aro a•dokna ka•sagipa mandekosa Skotong Minister-ni chokkio asongatna nanga” ine Bernard Marak janapataha.

BJP dolni bang•a dilgiparang matnange jinmana parakataniko jegale, Conrad Sangma angni kosako matnange agangipa manderangna aganchake rogenchimode, anga an•tangni kamko ka•na somoi dongjawa ine aganchakatskaha.

“Meghalaya a•dokni MDA sorkari baksa bakrime kamko ka•na BJP dolni dilgiparangsa jakko on•chenga. Ma•mong sorkarini BJP dilgiparang angna ia kamko ka•na nangenga, ia kamko dontongatna nangenga ine ge•etaniko on•genchimode golpo dingtanggenchim, indiba a•dokni BJP dilgipa ong•e kattarangko taridape aganani bidingo anga uamangna maming aganchakaniko on•na nangnikja” ineba Skotong Minister talatdapaha.

Batanggimin salrango NPP dolni National Vice President aro a•dokni Deputy Skotong Minister Prestone Tynsong, BJP dolni dilgiparangko Anti-NPP ba NPP-ko bon•atna miksonge campaign ka•ani bidingo uamangna aganchakaniko on•angaha ineba Skotong Minister parakataha.