Tura, April 22, 2022: Tura songjinmani sepango donggipa Srop gittimni bilsi 9 ong•gipa me•a bi•sa ta•rakgipa chi man•pakange janggitangko gimaataha.
Kobor man•soani gitade sianggipa Arian Tengkam M. Sangma Sonanpara LP Skulo poraiengachim. Ua skul joke noktangona re•bapilengachim. Ua Sonanpara dollong gita re•bagija, seng•sot ramako re•bae Kombe chiringko batsotmiting somoio ta•rakgipa chi man•pakangaha.
Uni sigimin manggisiko songni manderang pringni 9:30 bajimango Sonanpara dollong kokkimao balboe dongako nikenba uni manggisiko chioniko ra•doe bakan Tura Civil Hospital-o post mortem ka•na ra•angaha.
Da•al April 22 tariko pring 8:30 bajionin dondipgija mikka waani a•sel Garo Hills-ni bang•a a•jarangon chiring chibisikrang dal•bahani gimin me•a bi•sa janggitangko gimaataha.
Ia antini gisepo chio sripe janggitang gimatgiparangni gisepo Arian Tengkam Sangma 7-gipa ong•enga ine nikna gita man•aha.