Ampati, March 24, 2022: South West Garo Hills a•jani Betasing bajaro Automated Teller Machine (ATM) dongkujaengani gimin jolni manderang Ampati-ona re•angesa an•tangtangni chimonggimin tangka paisarangko okna nangengani a•sel neng•nikaniko man•enga ine GSU Western Zone (South) parakatenba, Betsaing bajaro gital SBI-ni ATM booth-ko kulie on•china dabiangaha.
Iani bidingo Tura Chandmari-o donggipa SBI, Regional Office-ni branch Manager-na lekka sedoatenba Betasing jolo ATM ge•sako kulie on•china GSU mol•molangaha.
GSU, WZ South-ni President Salman D.Sangma-ni parakata gitade, Betasing-o ATM dongjani a•sel jolni manderang km 10 mang chel•gipa ramako re•ange Ampati-o donggipa ATM-onikosa tangka paisarangko okna nangenga aro ian manderangna koros bon•na nangengani ong•enga ineba parakataha.
Betasing jolni manderang MGNREGS aro uandakgipa dingtang dingtang sorkarini on•atenggipa tangka paisarangko okna gitaba jolni manderang chel•a biapchi re•angna nangani gimin neng•nikani ong•enga ineba Salman Sangma parakataha.
Indake chel•a biaponiko tangka paisarangko oke ra•bana nangani gimin kenchakaniba ong•enga ine parakataha. Uni gimin Betasing jolo songdongenggipa manderangni namgnina SBI, ATM ge•sako kulie on•china SBI-ni officer-rangko mol•molataha.