Williamnagar, March 25, 2022: Niksamso A•chik Society (NAS) dolni Vice-president Griping Marak, Chiading, Dilsekgre, Mandalgipe aro Debrakgre songrango Jal Jeevan Mission ni Project ko songni manderangna name tarie on•jani bidingo duk ong•e koborna parakataha.
“Chinga Dilsekgre, Mandalgipe aro Debrakgre songni manderangni changni changna badi ka•e u•iataniko kna•e, obostako mikrontangchi nike u•ie mas•ie ra•na re•angaha. Chinga uamangni songona re•angon nokantio chi pipe-ni tap rangko nikaha indiba ua chi pipe rangoni chi jokjani a•selo pipe rang maram cha•plengaha. Jal Jeevan Mission ni miksonganiara, a•dokni kona noksik pilak nokdangona ring•ani chiko sokatanian ong•a indiba an•ching a•jani Contractor rang an•tangtangni namgnina sorkarini on•atgipa kamrangko name ka•ja. Indakgipa kamrangara songni manderangko kal•ake roa gita ong•a” ine NAS- dolni Vice President Griping Marak aganaha.
Chinga gipin gipin songrangchiba re•e JJM Project ni bidingo sing•sandianiko dakanggen ineba ua agandapaha.