Tura, Feb 5, 2023: Skotong Minister Conrad Sangma, Sonibar salo Tura DC Office-o nomination file ka•ani ja•man kobor ra•timgiparangna aganengon, election-o mai result ong•gen, ukode aganna man•ja. Indiba da•odipetde, chingo ka•dongsoani donga, NPP chu•gimik majority-ko man•gen. Mikkangchi collation ba chaprimanio re•anggipa somoioba, chinga dingtang dingtang political dolrang baksa collation sorkariko rikaha. Indiba mikkangchi nina maidakgipa obostarang ong•gen ine Conrad Sangma aganaha.
Dr Mukul Sangma-ni aganani gitade, Skotong Minister Conrad Sangma kema bi•na nanggen, maina TMC-ko “Bengali” Party ba Racial Comments ka•aha ine agana, iani bidingo maikoba agangenma ine sing•on, “Anga maming saloba, Racially Discriminate ka•ja. Anga West Bengal-ni Party ine agana, iako agananio mamingba gualani dongja. TMC West Bengal-ni based Party aro uni headquarter West Bengal, ian kakket ong•a. Uni gimin maming racial ka•ani dongja. Gnigipa anga maming saloba Bengali Party ine aganja TMC-ko, anga West Bengal-ni party, ine agana, ian kakket ong•a. Uni gimin da•alo TMC party North East gimiko mamingba pangchakani dongja, dilgiparang bak ra•enga, indiba organisation-o pangchakani namen komia. Ia kakket-kosa anga janapa, una agre mamingkoba TMC-ni kosako aganja” ine Conrad Sangma aganchakaha.
Unbaksana, BJP-ni candidate Bernard Marak aro UDP candidate John Leslee Sangma, mijarango nangni gimin statement on•anio bilongen critical ong•a, nangni nikanio candidate baksa mongsongbate dakgrikani ong•batgen ine sing•anina aganchakengon,
“Iakode anga aganna man•ja, uade manderangni jakosa ong•gen. Indiba gimikni gitan, uamangni mitakanirang (Criticism)-ko manderang angna aganengachim, Conrad Sangma Tura-na maiko dakjok. Indiba South Tura-ni manderang ma•sia, re•anggipa bilsi 5-ni gisepo MDA sorkari South Tura namen dingtangaha. South Tura-ni bang•bata gittimni ramarangko tarie ong•jok, water supply-ni gita dingtang dingtang gittimrango ringani chiko sokatna pipe-rangko teke on•jok, chirongdik ba (Tank)-rangko rikjok, dingtang dingtang biaprango street-light-rangko teke ching•atjok aro Tura-ni beautification-ko matchotjok, uandake dingtang dingtang development-ni kamrangko South Tura-na kraagitan, re•anggipa bilsi 5-ni gisepo MDA sorkari dake on•aha. Uni gimin, anga ka•dongsoenga, manderang chingni kamrangko nike, changsatai ia electiono NPP-na ba angni candidature-na vote-ko on•gen” ine Conrad Sangma election-ni ja•mano sorkari riktaina ka•donganiko parakangaha.