Shillong, July 14, 2022: All Meghalaya SSA Teachers’ Association (AMSSATA), February jaonin dormaharangko man•kujaengani gimin Sukrobar saloni jingjengatanirangko a•bachenggen ine parakataha.
AMSSATA-ni General Secretary, Defender S Lamare-ni u•iatani gitade, uamang Skotong Minister Conrad Sangma-na changni chang Memorandum-rangko sedoate dormahani gimin agan janapatahachim, indiba indita jarangna kingkingba ua mamingkoba aganchakja ine u•iataha.
AMSSATA July 5 tariko tom•aniko ong•atangaha, indake uamang July 15 tarikoni sima ari dongija asonge jingjengatna ku•mongangaha. AGHSSASTA-ba ia jingjengatanio bakko ra•anggen ine u•iataha.
SSA skulo skigiparang batanggimin 2016-17 bilsionin ja 8-ni arrear-rangko man•kujaenga ineba parakataha. SSA skulo skigiparangni bank account-ona a•dok sorkari tangkarangko chipatgenchimoba, ma•mong sorkarisa tangkarangko on•atskaenga aro SSA skulde ma•mong sorkarinisa ong•a. A•dok sorkari, SSA skulo skigiparangna dormaharangko on•na ma•mong sorkarini sokatgipa tangkarangko man•soja ine matnangskaenga ineba u•iataha.