Tura, June 12, 2022:West Garo Hills a•jani Dadenggre Civil Sub Division-ni ning•o donggipa Amingokgre songni LP Skul nok namsrangjahani gimin songni manderang tangka gilgrime Sonibar salo rikgrime on•tokaha.
Ia LP skulo bang•a bi•sarang skie ra•engachim, indiba skul nok namjani a•sel mikka waani somoio skie ra•na man•jae, bi•sarang aro skigiparang namen neng•nikaniko man•engachim. Ia LP Skul nokko Education Department nirok simsakata ba maming dakchakata dongja. Ia skulni skigipa salantian skul ka•na re•baoba skul nok namjani gimin mikka waode skie on•na man•gija neng•nikaniko man•enga ine songni manderang u•iataha.
Songni manderang ia skulo skigipa aro skie ra•enggipa bi•sarang mikka waani somoio skie ra•na man•jani gimin, songgimik tangka gilgrime, bolrangko rate, tin-rangko ra•e, local MLA aro education department dakchakaniko on•jaoba an•tangtangni bil jakchi bi•sarangni namgnina skul nokko tarigrime ba rikgrime on•aha ineba u•iataha.
Indake Amingokgre LP Skulko education department aro local MLA simsakgija galchipani gimin songni manderang suk ong•gijaniko parakatjolaha.