Ranikor, September 15, 2022: South West Khasi Hills a•jani NGO-rang jekai Headman Association, AKHAF aro GSU, Bristibar salo jinma tom•aniko ong•ate, Garo Medium Skulrango, A•chik skigiparangko kamo rakkina nanga ine dabiangaha.
Khasi Hills-ni bang•a Garo Medium Skulrango A•chik skigiparangko rakkigija, gipin jatrangko rakkiengani a•sel poraienggipa A•chik bi•sarangna dal•bea gimaani ong•enga. Indake A•chik ku•sikko aganna aro skina man•gijagipa gipin jat skigiparangko Garo Medium LP skulrango rakkianichi, A•chik ku•sik gimaangengjok ine AKHAF-ni President Clivestar Ch. Marak parakataha.
“Bang•a Garo Medium LP Skulrango, gipin jat skigiparangko kamo rakkiengani a•sel skulo poraienggipa chatro chatrirang uamangni skiako ma•sijae neng•nikaniko man•enga. A•chik Ku•sikko aganna man•gijagipa gipin jatrang skulo skiengani gimin bang•a A•chik ma•a parang dedrangko skul watatna neng•niktokenga. Gipin jat skigiparang A•chik ku•sikchi skina man•jani gimin, A•chik ku•sikko ripingani pal batesa gimaangengjok. Uni gimin Khasi Hills a•jani pilak Garo Medium LP Skulrango, A•chik skigiparangko kamo rakkina nanga. Uni gimin Chinga SWKH a•jani NGO-rang Garo Medium Skulrango gipin jatko kamo rakkianiko raken jegala” ine AKHAF-ni President janapataha.
Uni gisepon MDA sorkari “Ia chingni dabianiko knachakja ong•ode, chinga jingjengataniko maming dakeba dontongjawa, mikkangchi rakbata ja•kurangko de•e jingjengatangkugen” ineba parakataha.