Tura, March 2, 2022: Meghalaya a•dokni SSA skulo skigiparang ja 5-ni dormaharangko man•kujaengani gimin, Budbar salo Khasi, Jaintia Hills aro Garo Hills a•jarango SSA skulo skigiparang a•dok sorkarini kosako jegale jinma re•jomaniko ong•atangaha. Apsandake, All Garo Hills SSA Teachers Association (AGHSSASTA), ru•uta salrangoni dabienggipa dormaharangko man•kujani gimin India a•songni Prime Minister Narendra Modi-na lekka sedoataha.
“Chinga SSA skulo skienggiparangna ru•uta jarangni dormaharangko man•kujani gimin bang•a neng•nikanirangko man•enga. Chinga salantio neng•skime dedrangni skul admission, monthly fee-rangko, bijoli bill, chi bill-rangko gamna man•jae neng•skime, sko sa•dikna nangenga. Ia obostani bidingo chinga a•dokni Skotong Minister Conrad Sangma aro Education Minister Lakhmen Rymbui-na lekkarangko see mol•molaha, indiba da•alona kingkingba ching•ni mol•molanirangko knachakkuja. Skotong Minister, chingna ja gittamo jasani dormahako aro jadoko
jasani dormahako on•gitchie roenga.Uasan ong•aigija SSA Skulo skigiparang 2016-17 bilsini ja chet-ni dormaharangko da•alonaba man•kuja, iani bidingo chinga CM aro Education Minister-ko changni chang gisik ra•ataitaie grongahachim, indiba dormahani bidingo maming kobor dongkuja. Chingni dabianirangko knachake sorkari chingna dormaharangko jaanti on•genchimode, chinga maming neng•nika gri nengrae janggi tangna man•pagenchim” ine AGHSSASTA-ni seatgipa chittio janapataha.
Uana agreba SSA Skulo skienggipa sakantikon kam regularise ka•china mol•molangaha. “Re•anggipa 2009 bilsini RTE Act-o seani gitade je skigiparangkon RTE-ni dongimin niamo pangchake seokahachim, uamang Regularise ka•giparang gitan dormaharangko jaanti man•gen” ine janapenba uamangni kamko regularise ka•china mol•molangaha. Sing•sandianirangko dakahaon gipin a•dokrang jekai Assam, Sikkim, West Bengal aro Uttarakhand songrango SSA skigiparangni kamko regularise ka•aha.
SSA skulni Lower Primary (LP) Section-o skienggiparang japrako gong 19,044 aro Upper Primary (UP) Section-o skienggiparang japrako gong20,493-kosan man•enga. Da•oni chasongo ia tangkarang mandeni nanganirangko nokdangni nanganirangko chu•sokatna man•ja. Uni gimin SSA Skulo skigiparangni dormahako japrako gong hajar 50-ona bariatchina gitaba AGHSSASTA chittio mol•molataha.
Indake jingjengataniko dakengon, a•dokni Education Minister, Lahkmen Rymbui Budbar salo, SSA skigiparangna jagnini dormaharangko on•gnok ine parakatskaha.