Tura, March 13, 2023: All Garo Hills SSA School Teachers Association (AGHSSASTA), West Garo Hills a•jani Deputy Commissioner gita a•dokni Education Minister Pa Rakkam Sangma-na lekka sedoataha.
AGHSSASTA-ni seatgipa chittio janapatani gitade, man•na nanggni dormaharangko aro arrear-rangko on•na baksa SSA skulo skigiparangni dormaharangko baridapate, SSA skulo skigiparangko Regularise ka•china mol•molataha.
“Chinga SSA skulo skigiparang January jaonin dormaharangko man•kujaenga. Indake bilsi a•bachengaoni dormaha gri chinga neng•nikanirangko chagrongna nangenga. Gital bilsi a•bachengon, chinga dedrangrangna skulrango Admission-rangko ka•na nangan baksana lekka ki•taprangko bree on•na gita nanga. Uasan ong•aigija chinga Project Approval Board (PAB)-ko 2016-17 bilsioni man•na nangenggipa ja 8-ni arrear-rangko man•kujaenga. Uni gimin chingni pilak neng•nikanirangko aro chingni man•na nanggni dormaharang, arrear-rangko on•pachina mol•molangna sika” ine janapataha.
Batanggipa 2006 bilsio SSA skulni skigiparang gong 1500 dormakosan man•aiaha, indiba 2008 bilsio gong 3000 dormahako man•aha, 2010 bilsio gong 6000 dormahako man•aha. Uandake 2013 bilsio LP skulni skigiparangna gong 9,200 aro UP skulni skigiparangna 9,900 dormahako man•aha. Indake 2016 bilsio gong 20,349 dormahako UP skulo skigiparang aro LP skulo skigiparang gong 19,044 dormahako man•aha.
Indake ong•enggon, chingni man•enggipa dormaharang aro salantio jakkalna nanganiko chu•sokatja. Uni gimin chingni dormaharangko baridapatchina chinga mol•molna sika ineba janapataha.
“Chinga ru•uta bilsirangna skulo sikgenchimoba, chingni kamko da•onaba Regularise ka•kujaenga. India a•songni gipin a•dokrang jekai Assam, Sikkim aro West Bengal-ni SSA skulo skigiparangko Regularise ka•aha. Uni gimin chinga SSA skulo skigiparang, chingni kamko Regularise ka•china mol•molna nangnika ineba janapataha.