Tura, December 13, 2021: Ru•utbea sal somoirangoni dabienggiparangko da•alonaba chu•sokatjaengani gimin, All Garo Hills Joint Action Committee (AGHJAC) Tura Chasinggre-o donggipa North Eastern Hill University (HEHU) Campus-ni napram dogalchol mikkango jinma tom•dake sima ari dongija (indefinite) office picketingko Sombar saloni a•bachengataha.
Tura NEHU Campus-ni gate mikkango indefinite office picketingko ong•atani miksongara ru•uta sal somoirangoni NEHU-ni Vice Chancellor (VC)-na lekkarang ba memorandum-rangko on•ne, Tura NEHU Campus-ko namdapatchina AGHJAC dabiengachim, indiba da•alona kingking mingsakoba chu•sokatkujaengani gimin, AGHJAC, Tura NEHU Campus gate mikkango office picketingko ka•enga ine AGHJAC-ni Convenor Te Balkarin Ch.Marak kobor ra•timgiparangna aganaha.
AGHJAC-ni mongsonggipa dabianirangara a•jatangni (local) Pro Vice Chancellor-ko Tura NEHU Campus-o appoint ka•china, A•chik a•songo poraienggipa chatro chatrirang Tura NEHU-o admission ka•na on•na nanga, NEHU-o kam ka•giparangko Service Regularize ka•china aro uandake dingtang dingtang Campus-rang aro Hostel-rangko rikdape on•china, gital gital subject-rangko NEHU-o ra•gatchina, jedakode A•chik a•songni chadamberang NEHU-o poraie bang•a namgipa cholrangko man•gen aro mikkangchi A•chik a•songna namroro silroroaniko ra•bana man•gen ia miksonganio dabie AGHJAC office picketingko a•bachengatenga ine Balkarin Marak agandapataha.
“Chinga da•alo NEHU-ko picketing a•bachengattaienga re•anggipa jarango bang•a dingtang dingtang dabianirangko on•china dabie jingjengataniko ong•atengon, NEHU-ni VC re•bae chingko gronggen ine ku•rachakahachim, indiba da•alona king kingba VC re•bakujani gimin chinga jingjengataniko a•bachengataha. Ua an•tangni ku•chakgiminko chu•sokatajahani gimin chinga jingjengataniko a•bachengattaina nangaha. Maina A•chik a•songo donggipa NEHU-ko chinga namatna man•jagenchimode, Garo Hills-ni chatro chatrirang bilongen ja•manchakgen, uni gimin AGHJAC da•alo rakbee ja•kuko de•enga, indiba knachakjaengani gimin chinga jingjengataniko a•bachengtaina nangao ga•akaha. Uni gisepon NEHU-ni VC chingna seachi ka•donganiko on•na man•jagenchimode aro dabianiko chu•sokate on•jaode jingjengataniko dontongjawa, mikkangchiba jingjengataniko dakangkugen. Uni gimin NEHU-ni VC chingni dabiako knachake chu•sokatna nanga aro ua Tura NEHU-ona re•bae namgipa aganchakaniko on•na nanga. Uni gisepon ua re•baja ong•ode, chingni dakna nangako chinga dakangaigen” ine GSU-CEC, Tura-ni President, Zikku Balgra N.Marak agandapataha.
Da•o ong•enggipa NEHU-ni VC, chingni dabianiko chu•sokatajani gimin aro 80% markrangko man•gipa chatro chatrirangko NEHU-o admission ka•na on•jani gimin chingni gisik ka•tongo namen suk ong•ja. Batanggimin sal somoirango Tura NEHU Campus gate mikkango chingni sit-in-demonstration-ko ong•atmitting somoio NEHU-ni VC, Diwali Pujani ja•mano re•bae chingko grongna ku•rachakachim, indiba ua da•alona king kingba re•bajaha. Indake chingko cha•boke togiani gimin, chinga da•alo indefinite office picketingko a•bachengatenga. Indake ong•engon, NEHU-ni VC chingna ka•dongani kattako seachi on•jagenchimode, chinga dabianiko dontongjawa.
Maina, A•chik a•songni chadamberangko NEHU-o poraina chol on•jagenchim ong•ode A•chik a•songni chadamberangna dal•bea gimaani ong•gen. Uni gimin chingni dabiako VC knachakna nanga, knachakja ong•ode rakbate jingjengataniko dakangkugen ine GSMC, HQ-Tura-ni Assistant General Secretary Cyril A.Sangma aganatskaha.