Ampati, May 24, 2022: Tura-ni MP Agatha Sangma, South West Garo Hills a•jani Developmental Scheme-rangni bidingo District Developmental Co-ordination aro Monitoring Committee (DDCMC) aro DISHA Committee-ni baksa tom•e nipiltaianiko dakangaha.
Ia tom•aniko Sombar salo Ampati, DRDA Conference Hall-o ong•atangaha.
Indake ia tom•anio Salmanpara elekka-ni MLA Winnerson D. Sangma, State Level Public Grievances Committee-ni Vice Chairman Clement G. Momin, SWGH a•jani Deputy Commissioner Saljong K. Marak, Block Development Officer (BDO)-rang aro bang•a Department-ni Officer-rang bakko ra•angtokaha.
Ia tom•aniko ong•atanio bang•a Department-ni Officer-rang, ma•mong sorkarini on•atgipa Scheme-rangko matchote kam ka•ani aro unbaksana mitam scheme-rangko bang•a neng•nikaniko man•ani a•sel matchotatna man•gijani bidingo talatangaha.
Agatha Sangma uamangni janapgimin neng•nikanirangko namatna aro scheme-ni project-rangko matchote kam ka•na gita uamangni neng•nikanirangko chel•atna kamko ka•anggen ine ku•rachakangaha.
Unbaksana, Rerapara Block-ni BDO, RD. Shira tom•anio dongpae bang•a songni neng•nikaniko aganjanapangaha. Bang•a songrangon me•chikmarangko VEC-nk Secretary songna jechaktokenga. Me•chikmarang Office-chi re•na dona neng•niktokenga aro unbaksana nokni kamrang dongani a•sel kam ka•na somoi gita sokbarongja. Me•asako VEC-ni Secretary songgipa songrang bang•a changon rama jallang aro sorokrangko dabironga, indiba me•chiksako VEC Secretary songgipa manderang pangnan nokantiona chi sokatani aro uandake nokna namgni kamkosa dabironga ine aganangaha.
Garobadha SBI Department-o kam ka•enggipa manderang chu•onga gita internet dongjani bidingo aro phone connectivity namjani bidingoba aganjanapangaha.
Medical Department-ni manderangba ia tom•anio dongpae Hospital-o Gynaecologist-ko donchina, PHC aro CHC-na Ambulance bolprakko on•china, Ampati Hospital-o chirang chu•ongjani bidingo, bilsi chu•sokgija oko dongani, an•tangko so•ote siani aro bang•bata manderangni ojarang samo bebe ra•e janggi tangengani bidingo aganjanapangaha. CM-ni PHC aro CHC-ona sokatgipa Safe Motherhood Scheme-ni dakchakanichi oko donggipa ma•giparangko nambata sanna bannaniko man•na gita Hospital-ona ra•angna garirang chu•onga gita sokatgipa fund-rangniko jakkalangna gita man•a ineba agandapangaha.