Shillong, April 11, 2022: Meghalaya a•dokni gital bobil dol “Lawei ba Phyrnai” a•doko so•sojengjeng ong•atjachina aro a•doko namgipa dilgiparangko seokangna man•na gita Meghalaya a•dokni BJP didiataha.
Mikkang bilsini Assembly eleksin-ko ong•atna da•o jachetsan dongaiahani gimin eleksin-ko name ong•atenba gital dilgiparangko seoke gital sorkariko rikna man•na gita gital bobil dolko a•dokni BJP President Ernest Mawrie didiangaha.
A•dokko so•sojengjeng ong•atani pal a•doko namroro silroroaniko ra•bana man•na gita eleksino namgipa dilgiparangko seoke gital sorkariko rikna cholko on•china gitaba BJP President mol•molataha.Da•ororo a•dokni manderang bang•a neng•nikanirangko chagrongna nangan baksa manderang kamrangko ka•e cha•na cholko man•jaengani gimin a•doko namroro silroroanirangko nikna man•jaenga. Indiba da•o eleksin sepangahani gimin namgipa dilgiparangko seoke namgipa sorkariko rikna namgipa cholba ong•enga ineba BJP President janapataha.
Meghalaya a•doko tom•tomaniko aro namroro silroroaniko ra•bana miksonganian BJP-ni mongsonggipa nangnikani ong•enga ineba janapataha.
“Meghalaya a•doko anga BJP-ni President ong•chengaoni intalan HNLC bobil dol baksa agangrike tom•tomaona rimbana nangnikanian angni miksongani ong•a. Da•o HNLC bobil dol baksa agangrikna dolgnian ku•baltegiparangko seokmanaha” ineba Mawrie agandapataha.
Uni gimin a•doko tom•tomaniko rakkiangna cholko on•china gital bikotgipa bobil dolko mol•molangaha.
HNLC bobil dol baksa agangrikna ku•baltegiparangko seokani ja•mano “Lawei ba Phyrnai” gital bobil dol, a•dokni Skotong Minister-na ka•mikkenatani kattarangko see email gita watataha. Gital bobil dolni dabiani gitade, HNLC bobil dolni gitcham dilgipa, Julius K. Dorphang-ko pattokoniko watpilchina dabiahachim, indiba uamangni dabianiko knachakja ong•ode, LP Skul nok te•sako boma gopretdapgen ine ka•mikkenataha. Julius Dorphang-ko re•anggipa 2017 bilsio me•chik bi•sa saksako drae til•ekani mamlao bilsi 25-na pattoko donataha, indiba gital bobil dol uko pattokoniko watpilenba April 9 tarik walni 10 bajio Shillong ISBT-o donggipa bus gariona rimange uko saksan donangchina dabiangaha.