Shillong, Jan 13, 2023: NPP dolni mongsonggipa dilgipa aro skotong Minister Conrad Sangma Budbar salo Trinamool Congress (TMC)-ni re·baenggipa election-o susaani bidingo agananina aro TMC-ni election-o chee sasonona re·bagenchimode, lak 3 kamrangko on·gen ine ku·chakanina aganchakaniko on·ataha.
Warachakenggipa ba Opposition dolni dilgiparang “TMC Jersey”-ko ganne manderangni nangnikenggipa dingtangataniko ra·bagen ine dakmikenga, maina uamang Congress-o dongmitingon ia cholko galaha ine Pa Sangma janapataha.
“Lak 3 kamrangko chadamberangna on•na gita TMC-ni ku·rachakaniko dakgenchimode, Congress-ni sason ong·mitingon dakgenchim. Indiba uamang unomiting mamingkon dakna ja·ku de·jaha, uni gimin uamang mai gital ja·ku de·anirangko dakgen angade u·ija,” ine TMC sasonona re·baode lak 3 kamrangko chadamberangna on·gen ine ku·rachakani gimin Skotong Minister jegalataha.
“Dr Mukul Sangma-ni bilsi chet sason ka•mittingo (Congress)-ni manderang uni kamrangko nikaha aro uamangni janggi tanganio neng·nikaniko on·aha ine anga bebe ra·a, je project-rangna uamang pangchakani ro·ongrangko songahachim aro kamrangko a·bachengahachim, uarangko matchotatna tangkarangko on·jaha,” ineba Skotong Minister agandapataha.
MDA sorkari ia matchotgijagipa project-rangko matchotataha, jekai Ampati Water Supply Scheme, ine NPP national President aganaha. “Rai-ko on·ani ja·mano, bang·gija tangkarangsan, kror 5 ba 10-ni gitasan re·anggipa sorkarini sasono man·aha,” ine ua aganengon, Ampati-ni project-na kror 100 ong·nasiple tangkarangko on·ahachim ineba agandapataha.
Manderang dingtanganiko ra·bana 2018 bilsio pu•onaha ine Skotong Miniater aganaha.
“Da·o an·ching dingtang dingtang re·mikkanganio aro dingtang dingtang program-rangko a·bachengataniko nikna man·enga. Game cha·giparangna dakchakaniko on·na, ge 45,000 self-help group-rangko bikotaha aro bang·a dingtang dingtang kamrangko gital cholrangko bikotaha, una agreba sakgipinrangna kam on·na man·gipa cholrangko bikotna man·aha,” ineba Pa Sangma aganaha.