Baghmara, May 27, 2022: South Garo Hills a•jani Association for Democracy and Empowerment (ADE) Gasuapara Regional Unit, Bristibar walo NGO dilgiparangko kragija Tura-ni SP Tura main thana-ona rimange walsa donchina ge•eaniko raken jegalataha.
Indake A•chik jatni kosako ong•gija kam ka•aniko aro NGO dilgiparangni kosako kragija kal•steke roenggipa, West Garo Hills a•jani SP, Vivekanand Singh Rathore-ni kamko ra•chakna man•jawa ine ADE Gasuapara Regional Unit parakataha.
Tura-ni “SP maming dos grigipa chingni dilgiparangko indin dos galdrae thana-ona rimangate donaniara namen kratcha•beani ong•a” ine ADE Gasuapara Regional Unit-ni General Secretary Menward D.Sangma parakataha.
Dos grigipa manderangko skatang kal•ake rona niam dongja, ua saksa SP ong•pile mande sakantina on•gimin niamko ma•sijama ineba ADE sing•doangaha.
Uni gimin je pulis officer-rangan NGO dilgiparangko kal•ake roanio jak dongachim, uamang gimikkon gipin biapchi, chong•motan Garo Hills-ni a•palchi kam ra•jitangna nanga ine ADE Gasuapara Regional Unit dabiangaha.
Maina indakgipa officer-rangni a•selan namgipa officer-rang namgija bimingko man•ronga ineba ADE-ni dilgipa janapataha.
Minggipin indakgipa officer-rang jatna a•songna nama kamko ka•gipa ong•ja aro uamango maming ka•dongani dongja ineba janapataha.
Uni gimin kakket bichalko on•na gita namgipa officer-ko Garo Hills-ona ra•baskachina ADE-ni dabiani ong•a ine Menward Sangma janapataha.