Tura, April 2, 2023:A•chik Association for the Protection of the Environment (AAPE), Rongram chiringo sera bera jabolrangko galengani gimin, Rongram chiringko rongtalatna aidakode man•gen, ia miksonganio songni Nokma aro bajar Committee-ko gronge, ja•ku de•na gita chanchirimaniko dakaha ine u•iataha.
Ia Rongram bajaro dokkan dakgipa bajar anti cha•giparang, wak, matchu, do•o aro na•tok den•giparang, chiringo skatang jabolrangko galani a•sel sera bera ong•atenga. Rongram chiring bang•a songrang gita jokange, Chibragre picnik cha•ram biap Ganol chibimao nangdimeaha. Tura-ni manderang, Ganol chibima Na•rongkol-oniko pumping-chi ra•doe, Father Compound-o chimonge watatgipa chiko ringsoenga.
Uni gimin Rongram chiringo skatang jabolrangko galpajachina mikkrakatan baksa manderangni namgnina songni Nokma aro Bajar Committee-ko gronge agan golpogrike chanchirimaniko dakangaha.
Rongram Allagre songni Wajeng B.Marak-ni agana gitade, “Chingo jabol galna biap dongja aro darangba jabol galna biapko on•jani gimin, chinga Rongram jolo neng•nikaniko man•enga” ine aganaha.
Jabol galna biap man•jani gimin, Wajeng Marak an•tangni baganko on•aha. Rongram jolo jabol galna biap dongjae, bilsi 10-na skangde Rongram chiringosa jabolrangko galani gimin Wajeng Marak suk ong•jae, an•tangni baganko on•aha.
Wajeng Marak-ni parakatani gitade, Rongram bajaroni jabol galram biapona kilomiter 2 mang chel•a. Indiba jabol galram biap sambao sakgipinni bagan dongani gimin, wachini somoio jabolrang gipinni baganchi man•pakangengani gimin ua biapko bera kachange on•china ba retaining wall ka•china sorkarini dakchakaniiko bi•engachim. Indiba da•odipet sorkarioni maming aganchakaniko man•sokuja ine aganaha.
Indake ong•genchimoba, songni Nokma aro bajar Committee-rang jinma apsan tom•e, Rongram chiringo skatang jabol galaniko raken champengatgen aro niamrangko donne, rongtalatanirangko dakanggen ineba Wajeng Marak, AAPE-ni dilgiparangna
ku•rachakataha.
“Chinga AAPE-ni gita ta•raken jabol galram biapko mikka wachina skang wall kae on•china sorkariko mol•molatgen aro chingni ku•rang on•aniko knachakpachina gitaba didiatgen” ine AAPE Central Giverning Body, HQ Tura-ni Organising Secretary Challang M.Marak u•iataha.