Tura, Mar 30, 2023: A∙chik Association For The Protection of Environment (AAPE), HQ Tura, Environment-ni namgnina aro A∙chik A∙songko A∙gisi ong•gnioniko champengna ja•kku de∙engon, Garobadha Goragre songo niam gri koila bikotani gimin suk ong•gijaniko parakataha.
AAPE-ni Organising Secretary Challang M.Marak-ni u•iatani gitade, ua koila a•damoni Garobadha Pulis Station-ona km 4 ba 5 mang chel•achim.
“Angni mikrontangchi nikanio Garobadha Goragre-o dam 7 koila a∙damrang donga. Indake niam gri koila cho•aniko ta•rake, dongtongatchina chinga raken ja•kuko de•anggen. Uni gimin Sorkari aro West Garo Hills a•jani Deputy Commissioner, ta•rake niam gri koila bikotaniko champengna aro niamo pangchake raka sastiko on∙na nanga” ine AAPE-ni Organising Secretary dabiangaha.
A∙chik A∙songo niamni a•palo koilarangko bikotenga ong•ja, indiba Garo Hills a•jani gipin biaprangoba bilsigimikan dontonggija sruk sruk bikotenga ine parakataha.
Uni gimin pilakan indake niamni a•palo skatang an∙tangtangni mangnina koila bikotaniko dontongchina AAPE didiataha.
Indake manigija koilarangko bikotgenchimode, A∙chik A∙song changsaode A∙gisi ong•gen, uni gimin songni A∙king Nokmarang mikkangchina chanchie skatang koilarangko bikotna on•jachina AAPE mol•molataha.