Tura, June 9, 2022: Garo Hills-o antigimik mikka jimbee waanichi Bristibar pring 3:30 ba 4 bajimango a•a be•dape West Garo Hills a•jani Gambegre blockni ning•o donggipa Jebalgre songo a•a rudape ma•ningsa sakgittam janggitangko gimaataha aro ua nokdangni pagipa bilsi 41 ong•gipa Sengrik D.Sangma bilongbee saknaako man•aha ine South West Garo Hills a•jani SP Siddharth Kr Ambedkar koborna parakataha.
A•a be•dape sianggipa ma•ningsa sakgittamoni sakgni bi•sarangde namen bilsi chonkuengachim aro uamang sakgnian bilsi 39 ong•gipa ma•gipa Pritish Ch. Marak baksa rasong gribee an•tangni ka•sagipa pagipa aro ma•drang mahariko wate rang•gittik janggitangko gimaatna nangaha.
Pulisrangni u•iatani gitade, apsan pringni bakon minggipin a•sel South West Garo Hills a•jani Betasing blockni ning•o ga•akgipa Samatigaon songo bilsigni bi•sa saksa uamangni nokko a•a rudape nosto ong•anichi janggitangko gimaataha.
Ia a•sel Bristibar pringni 3:30 bajimango ong•aha ine koborna u•iataha. Ia a•selrang mongsongbate Betasing aro Gambegre blockni ning•o donggipa songrang jekai Samatigaon songo bi•sa saksa aro Jebalgre songo ma•ningsa sakgittam a•a be•dape janggitangko gimaattokaha ine South West Garo Hills a•jani Deputy Commissioner Saljong K.Marak parakataha.
Indake ong•engon, mikka dondikgija waani a•sel chi bana re•e adita nok jamrang chi riptokaha, mongsobate Betasing Blockni ning•o donggipa songrang ong•bataha. Ia chi dubiako man•gipa song nokrangko BDO aro gipin Officer-rang sandianiko dake, obostarangko nigrike nanga gita dakchakaniko on•na man•na gita kamrangko ka•enga ine DC u•iataha.
Da•o chi bana re•anichi a•selo ga•akgipa song dam 10 mangsan chi dubiako man•aha ineba Marak u•iataha.
Apsandake Gambegre blockni ning•o donggipa songrang A•dugre, Chenggapara, Saka Boldam-oni Purakasia-ona re•gipa main sorok aro dingtang dingtang songni rama jal•angrango a•arang be•dape ramarangko champengatani a•sel bang•a songni manderang re•a doanio namen neng•nikaniko man•tokenga ine kobor man•aha. Unbaksana Betasing blockni ning•o donggipa Mellim Chengkurigre aro Okkapara jolrango Ringde chi dal•bae bang•a nokrangko chi dubiaha aro rama jal•angrang nosto ong•aha ineba koborna u•iataha.
Indake chi bana re•anichi bang•a matchurang chi dubiako man•ne siaha aro Ampati jolrango garirangko chi man•pakangaha ineba u•iataha.