Shillong, Feb 2, 2023: Pynthorumkhrah elakkani NPP candidate Rocky Hek, eleksin o susana gita budbar salo an•tangni bimingko segataha aro eleksin o seokako man•genchimode, pekgipa ringa-cha•ani bosturang jekai drugs jakkalanirangko bon•atgen ine ku•rachakaha.
Pynthorumkhrah elakkao chang 5-na MLA seokako man•gipa BJP dolni A L Hek-ni grigipa Rocky Hek re•baenggipa February 27 tarikni Assembly electiono susana biming segatani salo una chakgipa bang•a manderang re•angpaaha.
AL Hek-ni kosako chena ka•donganiko parakatengon, “Chinga chechongmotgen ine ka•donga, maina ia elakkao dingtanganiko nangchongmota” ine Rocky Hek aganaha.
Ia elakkao maming namroro-silroroani dongja aro bang•a chadamberang pekgipa bosturangko jakkale salko re•atgiparang ong•a, maina uamango maming janggi tangani chol dongja ineba ua aganaha.
“Anga seokako man•genchimode, angni janapgimin pekgipa ringa-cha•ani bosturangko bon•atna jotton ka•gen aro manderangni janggi tangani gadangko namdapatna kam ka•gen,” ine R Hek aganangkuaha.
Ua chadamberangna cholrangko dake on•na ku•rachakaha, jedakode gimikni gitan silroro namroroaniko ra•bana man•gen.
Rocky Hek-ni aganani gitade da•o dipet ramarang, chi sale on•anirang, street lightrang aro bang•a gipin nanganirang dongja ineba aganangaha.